屈臣氏ifc開母嬰產品專門店

好多現代媽媽都好繁忙，但BB嘅嘢都要好上心，相信唔少媽媽都希望有個地方，可以一次過搜羅全方位嘅母嬰護理資訊、兼買埋世界各地嘅母嬰護理產品，依家就可以了！最近去ifc mall行街，見到間粉色做主調、仲有個可愛熊仔頭做標記嘅新店，原來係屈臣氏全港首間Watsons bébé！入面貨品齊全，由紙尿片、奶粉、嬰兒濕紙巾、母嬰護膚以至營養保健食品等都一應俱全。店員仲話，店內有全球超過1,500個熱門產品，來自歐美、日韓等地區，其中30個仲係獨家品牌，好似Baby Naturals by Watsons有機護膚品、Bétta嬰兒哺育用品、Green Life韓國天然果乾、Pulmuone有機韓國嬰兒食品等。

黛安仲知道舖頭嘅木地板同牆壁設計，特別採用無化學添加嘅Kirei Board，店內仲播放住悠閒嘅搖籃曲，配上色彩繽紛嘅雲彩天花及牆上通透嘅牛奶玻璃樽布置，帶埋BB來shopping都唔怕佢扭計啦！