玩具反斗城Geoffrey 帶寵物蛋上《晴報》探班

聖誕禮物除咗要好玩，培育到小朋友的愛心都好重要。玩具反斗城吉祥物Geoffrey昨日嚟《晴報》探班時，帶咗好受小朋友歡迎的Hatchimals Egg上來，仲教埋大家點樣用「愛與力量」孵蛋！

聽玩具反斗城嘅marketing姊妹講，呢隻Hatchimals Egg好紅㗎，之前每個禮拜都賣出500、600隻，仲一度斷貨。點解咁受歡迎？佢最好玩嘅地方係玩家要同隻蛋互動，要成日摸下、敲下隻蛋，畀多啲愛心，雀仔先可以「脫殼而出」，到時先知道佢係乜嘢毛色，夠晒驚喜。之後仲可以慢慢教雀仔行路同照顧佢，培育小朋友耐性同責任心就一流啦。等咗一排，隻蛋最近終於返貨啦！今個星期四（22日）朝早10點會喺海運大廈旗艦店發售，據知貨源只有300隻，$999.9就可帶返屋企，仲會隨盒包埋$300玩具反斗城禮券。