消委會出新書 拆解健康迷思

每次消委會公布新嘅測試，都會成為市民嘅購物指南，唔少醒目消費者都當《選擇》月刊係「寶典」咁參考。唔經唔覺《選擇》已創刊40年，消委會年中宣布推出新書《健康手札》，輯錄女性最關心嘅美顏、飲食同幼兒文章，等消費者更易掌握健康要訣，上個月終正式發售。

黛安第一時間上網訂咗本返來仔細研究，本書用簡約嘅文字配埋精緻嘅圖片同插畫，講解咗好多實用消費貼士，例如點樣揀潤唇膏、唔同食用油有咩分別、小朋友應該點清潔口腔等等。消委會總幹事黃鳳嫻（Gilly）仲幫本書寫序，話希望呢本手札可以釐清坊間以訛傳訛嘅迷思，令消費者有所領會，得到啟發，就係消委會最大嘅喜悅咁話。