$140南港島綫紀念票 附迷你列車模型

香港鐵路網絡愈來愈發達，近年都多咗鐵路迷四出朝聖。最新的「聖地」自然係啱啱通車的南港島綫！除咗影下相，在無人列車上用「車長視角」拍片，仲有梗係唔少得儲埋紀念車票啦！港鐵下星期六（21日）起一連4星期推出限量版南港島綫車票套裝，分「海洋公園篇」、「黃竹坑篇」、「利東篇」及「海怡半島篇」4種，套裝會有一張車票、一個票套，仲有埋迷你電動列車模型，同Q版車站入口、建築物模型同路軌底版呢啲配件，儲齊晒玩《港鐵GO！》份外有意思。咁抵玩都係每套140蚊，公關姐妹話別注夜光版都會同步發售，價錢一樣，但數量更少，想儲真係要mark實了。