《一屋老友去旅行》 歐陽震華全家玩轉寶島

猶記得高收視劇集《一屋老友記》溫情滿載，令觀眾感動窩心；無綫找來原班人馬拍台慶節目《一屋老友去旅行》，由「大寶」歐陽震華（Bobby）做導遊，帶領「寶家」一家大細遊台灣，眾人互爆對方蝦碌事，驚險、爆笑樣樣齊！

今次寶家結伴同遊寶島台灣兩星期，在台北、新竹、宜蘭、花蓮及墾丁留低腳毛。提到首度與劉老師、羅蘭姐及Madam Lo（盧宛茵）去旅行，眾人大讚三人勁玩得，尤其劉老師一見刺激玩意即衝去試玩，不但坐越野車濕身除衫，又半裸讓「三寶」張頴康擦背。劉老師笑說：「因為喺無綫被困得太耐，今次放我出去，梗係去玩啦。」至於羅蘭姐雖已82歲，但Bobby大讚對方好精靈，行路迅速不用別人扶。另外，兼任「為食組」組長的Bobby，大爆Madam Lo比他更為食，行夜市時竟然獨吞像手臂一樣粗的大肉腸，Bobby大笑說：「Madam食足15分鐘，食到停機都仲食緊塊炸皮，笑到我差啲失禁！」

阿滕放煙花險燒屋

有說去旅行日對夜對，最能考驗親情、友情，不過眾人異口同聲表示相處融洽，但轉頭又互爆瘀事。好像大家在屋外涼亭放煙花時，「二寶」阿滕取來一支巨型煙花，插在水田點火，誰知插得太實，煙花竟然就地狂燒，險將涼亭燒毀，嚇到當地屋主個心都離一離。今次寶家上下玩得開心，領隊Bobby笑指節目以親情為主，希望他們的旅程能感染年輕人，令他們多些帶長輩去旅行，享受家庭樂。

滕麗名服裝：Rococo Fashion

場地：香港九龍東皇冠假日酒店

撰文：李潔盈

攝影：林良明

編輯：林梓添

設計：梁政敏