奧運金牌選手掌舵 周凱旋做乘客 誠哥投資Startup帆船隊

長和系主席李嘉誠（誠哥）旗下「維港投資」嘅成功投資項目多到數唔晒，最近見到負責打理維港投資嘅周凱旋（Solina）喺社交網站分享咗張玩帆船嘅相，黛安梗係周圍八下係咩活動啦！

創科以外 支持體育

原來維港投資最近投資咗一隊由英國頂級帆船手、奧運金牌得主Ben Ainslie揸fit嘅Land Rover BAR帆船隊，上周末去咗福岡參加2016路易威登美洲杯世界系列賽首輪賽事，Solina以投資者身份現身支持，當日船隊仲贏埋champion！

維港投資一向都投資創科項目為主，點解今次會投資帆船隊？黛安聽講，原來誠哥每年都會畀一個quota，等維港投資可以「離經叛道」揀一個偏離公司範疇嘅項目去投資，今年Solina就揀咗Land Rover BAR帆船隊。傳統嘅運動團隊好多都係由財團或投資者出資，運動員好似打工咁為投資者效力，但Ben Ainslie嘅理念好特別，是用經營Startup嘅方式組織船隊，令船隊可保持獨立性。咁究竟投資船隊有咩回報？聽講係無㗎，只當係支持體育運動咁話。

雖然話係離經叛道，但正正係每年呢一個quota，孕育咗好多好成功嘅項目，例如唔少人手機都有嘅Spotify，同創立AlphaGo嘅人工智能公司DeepMind，都係「偏離核心」投資。