懲教賣物籌款 軍人獻操吸睛

上星期六黛安去了赤柱，參加懲教署體育會主辦嘅秋季賣物會，原來今年已經係第64屆，主題係「懲心共聚、關愛香港」，凸顯香港是一個充滿愛心嘅城市。當日唔少攤位售賣在囚人士製作嘅產品，包括籐器、木製傢俬、盆栽植物、手工藝品及玩具等，今年仲加咗個小吃區，等市民品嘗懲教署6個訓練餐廳在囚人士精心製作嘅特色食品，分享他們學到嘅技能同成果。活動有嘢賣又有嘢食，吸引唔少市民參觀。

當日仲有不少精采表演，黛安最欣賞香港童軍總會港島第221旅龍獅隊演出，以及有歌連臣角懲教所在囚人士表演中式鼓，連懲教署警衞犬隊都表演埋一份！其實賣物會仲有另一重意義，因為當日賣物會籌得嘅款項在扣除支出後，會捐助超過40間志願機構及受惠團體，黛安就覺得好有意思。