信興廚藝中心開班 跟資深名廚學煮賀年菜

臨近新年，一家齊齊整整食團年飯，桌上總有幾款好意頭的賀年菜式，唔少人都想趁新年前學番幾味整畀屋企人食，今次有機會啦，信興廚藝中心前日正式開班授課，請來多位資深名廚擔任導師，包括暢銷食譜書作家陳家廚坊（陳紀臨、方曉嵐夫婦），佢哋教整髮菜蠔豉南乳豬手煲、生炒糯米飯，雖然無火煮食，但信興集團主席兼行政總裁蒙德揚都話，依然好夠鑊氣！

聽姊妹講，平時整豬手煲最少要炆兩個鐘，但喺信興廚藝中心學用高速煲炆豬手，只花15分鐘就搞掂，仲唔使睇火。慳出來的時間可用來炒糯米飯，導師陳家廚坊話，正宗「生炒糯米飯」要炒足半個鐘，邊炒邊加浸蝦米水、冬菇水，好花工夫。

蒙德揚同黛安講，信興廚藝中心具備旗下代理廚具，一概使用無火煮食，煮食時室溫無升得咁勁，而且安全，對有小朋友的家庭係一大好處，佢話連自己屋企都已轉晒用電磁爐，仲話曾經煮家傳的「蒙氏咖喱」畀員工食，員工都食到讚唔停！

除咗陳家廚坊，信興廚藝中心仲會有前羅富國教育學院及香港教育學院家政科講師黃梁淑英、擅長設計親子食譜嘅Sue-Anne、集媒體廚師、食物造型師同食物攝影師於一身十八般武藝嘅Sandra、同曾受聘於多間高級酒店嘅西廚周志威做導師。

如果想跟咁強勁的班底學廚，即日起至2月28日購買指定型號煮食電器產品，仲可用優惠價$100報讀（原價$680）的烹飪課程，姊妹們快啲去上番堂，趁新年露兩手！