引入礦物化粧 袁彌明話粉底都美顏

提起靚女袁彌明（Erica），大家都記得佢係港姐、美容達人，即使升級做咗人妻，伊人創辦嘅「袁彌明生活百貨」（mi ming mart）近年愈做愈掂，樓上舖轉戰旺區地舖。噚日Erica喺上環開party，公關姊妹一早話「新系列好正㗎」！

今次活動主角係mi ming mart其中一個王牌品牌Synergie Skin，姊妹們對呢個澳洲醫學護膚品牌應該唔陌生，Erica為咗隆重其事，專登請Synergie Skin創辦人Terri Vinson嚟香港分享品牌理念𠻹。品牌除咗生產至包裝所有過程都在當地完成，Terri對各種成分非常堅持，例如「不可以做動物測試，嚴格要求提供原材料的公司都要確保至少過去五年無用動物測試」，單單呢點就令人更加有信心。

講起以前好少搞event，Erica話，初初都係自己同同事喺社交媒體平台宣傳，舊年開始業務擴充，先搵agency幫忙推廣。伊人仲話，今次首次搞event介紹產品，希望透過品牌背後理念、用家感受打動顧客。講番產品，mi ming mart係Synergie香港區獨家代理，今次將品牌人氣健康礦物化粧系列正式帶嚟香港，睇宣傳口號就知有信心——「Let your makeup be your skincare」，化住粧都美顏，聽到都覺得吱吸引！