玩遊戲贏Häagen-Dazs雪糕月餅

呢兩日分享過，社企推出月餅同信用卡買月餅優惠，話口未完，《晴報》市務部姊妹開心share，佢哋都有活動陪大家迎接中秋！姊妹話，《晴報》舊年送雪糕月餅超級受歡迎，今年再接再厲送出100盒Häagen-Dazs雪糕月餅，仲係限量版新口味𠻹！

全新乳酪口味

今日開始一連5個見報日，《晴報》會送出60盒全新乳酪口味雪糕月餅「優悅心意」，每盒價值$368。另外，仲有40套「Häagen-Dazs×Le Creuset七星伴月限定套裝」，每套有2盒「七星伴月」雪糕月餅同埋1套Le Creuset陶瓷甜品杯連小匙，非常吸引。姊妹仲話，乳酪口味雪糕月餅今年首次推出，味道酸甜清新，食落唔會滯，啱晒一眾為食得嚟追求健康嘅姊妹。

每日留意《晴報》同上網回答問題，就有機會帶月餅返屋企同家人分享，記得click入《晴報》facebook專頁https://www.facebook.com/Skyposthk/參加遊戲啦！