維他加推「啡走」 港式系列總動員出場

品牌有新產品通常搞發布會，噚日維他奶搞搞新意思，喺君悅酒店擺個「維他港式系列」陣，維他奶國際香港行政總裁齊松（Charles）唔再企定定喺度咁嚴肅，司儀宋熙年（Sarah）變身小記者，即場同Charles以清談方式，介紹品牌最新出品——「啡走」。

外國長大嘅Sarah講起，返香港後好鍾意了解唔同香港特別食物，「究竟咩係啡走呢？」Charles話，大家對「啡走」呢個名未必好熟，其實啡走係香港茶餐廳獨特沖調方法，「唔加奶改為加煉奶」。

同大家試飲新產品之餘，Charles仲開心share最新電視廣告等大家率先睇。廣告用「香港人至識歎」做主題，帶出港式口味係港人至愛之一。問起點解今次隆重其事，Charles笑說，前年推出港式奶茶後，陸續推出鴛鴦同特濃奶茶，但「有埋啡走先算完整港式系列」。

唔講唔知，為咗做到最地道港式味道，Charles同團隊花咗唔少時間：「當初推出港式奶茶曾經同研發部同事走訪唔同餐廳試味，親自試沖心水味道，今次都唔例外，大家試咗好多款啡走，再返公司研究，務求做到好有口感兼啱香港人口味。」佢仲話港式系列啱曬香港人style，「講求快、靚、正，隨時都可以ready to drink，仲要凍飲、熱飲都得，幾時都啱飲！」