太古地產義賣書 10蚊本兼做善事

收到公關姊妹信息，太古地產愛心大使同香港小童群益會合辦嘅「書出愛心十元義賣」活動，原來已經踏入第七年！今個月星期四開始一連4日，每日由中午12點到晚上8點，太古坊ArtisTree有慈善義賣。

早前嘅書本回收活動反應好熱烈，聽講太古地產管理嘅office同商場、香港小童群益會旗下服務中心、到部分太古集團旗下公司，例如國泰航空、國泰港龍航空等office都有收集箱。此外，義賣書本中仲包括商務印書館、培生香港及新雅文化出版社捐出的書籍，一共收集到超過10萬本新書或二手書，比起舊年回收逾6萬本書增幅都唔少。

記得舊年慈善義賣籌得逾51萬元，今年善款就要靠大家多多支持啦，尋找心頭好之餘，又可以做善事，梗係要落力支持！講開又講，回收書本地點咁多，義賣前又要分類又要擺得整整齊齊，好多工夫喎！幕後功臣原來係超過500名太古地產愛心大使、同香港小童群益會義工，上個周末，太古地產CEO白德利（Guy Bradley）都去埋撑場，落手落腳同大家一齊整理同分類書本。

姊妹話，活動籌得所有善款會捐畀香港小童群益會，為有需要學童提供更多教育機會。活動最後一日即係4月24日，長者、學生及殘疾人士仲有買一送一優惠𠻹！另外，義賣期間，一次過買滿300蚊，可以得到誠品書店20蚊現金券㗎。