美心佛跳牆 燉盅也講究

一盅福建佛跳牆，食到個個抹晒汗？唔係唔好食，而係裝住佛跳牆個燉盅有蹺妙！最近美心中菜有新推廣，師傅經過精心考量，推出「味道‧福建」系列。新系列其中一道巧手名菜係傳統福建佛跳牆，聽美心中菜副總廚師蔡偉平講，今次佛跳牆用嘅燉盅叫「斷泥盅」，中間有層空心設計，確保上枱時留住溫度，keep到個熱度。

聽蔡師傅講，佛跳牆選料都好花思，唔止有鮑魚、花膠、海參等，仲有一隻白鴿蛋，佢仲話，「傳統佛跳牆有白鴿蛋，雖然成本高啲，一隻等如一打雞蛋，但膽固醇低啲，質感都唔同啲。」

除咗特色菜，福建風味頭盤小食，原來都好有特色，好似泉州菠蘿海蜇球，特登選用廈門一帶常見嘅菠蘿型「海蜇球」，蔡師傅笑說，有人以為海蜇球是用刀雕咗花紋，但實際佢本身就係咁樣。海蜇球咬落卜卜脆，加埋蔥油涼拌，都幾開胃。

食下食下，到甜品上枱時，大家都「抱」住個肚仔，但望一望甜品賣相，就知道一定要試。桂花紅棗糯米粿，紅、白色代表紅棗、桂花兩款味道，配上花生糖，食落口煙煙韌韌，令人記起細細個，屋企整嘅甜品，好有媽媽嘅味道！