國泰唐偉邦 7月11日起署理港龍CEO

噚日國泰航空喺機場接收旗下機隊第一架A350客機，夜晚仲喺機場開Party，黛安都去咗湊熱鬧。參觀新客機之餘，最開心見到一班老友，同時獲悉港龍CEO丘應樺（Algernon）嘅新動向：就係Algernon將由7月11日開始放假。佢會做啲咩？原來佢將積極考慮是否參加九月立法會選舉，競逐「航運交通界」功能組別議員！

Algernon休假期間，會由現任國泰企業事務董事唐偉邦（James）署理港龍CEO。查實James喺2009至2011年期間已經做過港龍CEO；加入國泰29年嘅佢，先後喺集團做過超過十個唔同崗位，如今要佢再度接棒港龍話事人，呢項任務對James嚟講當然絕無難度！

A350客機 寧靜慳油 仲有Wi-Fi

講番是晚主角A350客機，黛安參觀過後，真係好期待坐住佢飛一趟旅行。聽職員講解，客機最起碼有五大優點：首先，飛機座位比一航客機寬敞，其次，先進嘅空氣過濾系統能夠保持機艙嘅濕度，搭長途機都唔怕Dry；第三，由於機身隔音設施佳，飛行期間相對寧靜；職員仲話客機採用更輕嘅玻璃纖維打造，令重量大減，較舊款客機慳油20％；最重要係呢架飛機設有Wi-Fi服務，就算上咗機都可以繼續同人WhatsApp、上facebook，正呀！

活動上仲遇見《晴報》專欄作家林奮強，他提到國泰將斥1,800億元，未來十年接收70架新飛機，擴大機隊規模，投放之大足證國泰對本港航空業的承擔。