中電總裁扒氣球龍舟 同老友記提早過節

仲有幾日就係端午節，除咗食糭，當然唔少得游龍舟水同扒龍舟應節。聽中電公關姊妹講先知，人稱Paul Sir嘅中華電力總裁潘偉賢原來係龍舟健兒，Paul Sir一早同公司龍舟隊成員加緊練水，為嚟緊嘅龍舟比賽積極備戰。

原來Paul Sir勤練水之餘，都不忘做義工，關心社會。啱啱呢個周末，佢就同民政事務局副局長許曉暉、中華電力企業發展總裁莊偉茵（Quince）同營運總裁蔣東強（TK），提早同200位屯門區老友記「過節」，大派健康糭同精緻吊飾香囊，老友記個個開心笑開眉。

陪老友記提早慶節之外，Paul Sir仲話要即場扒龍舟𠻹！原來係佢哋一早準備好，用800個氣球扭成、長14呎嘅龍舟，一眾嘉賓齊齊變身龍舟隊。唔好以為係氣球龍舟就好輕鬆，要夾埋個拍子都唔易，呢隊嘉賓龍舟隊睇嚟都好合拍，姿勢有板有眼㗎。

講番「和您一起過節」呢個活動，其實係中電自2014年推出嘅關愛社區活動之一，趁住節慶日子夥拍社區夥伴，邀請長者同管理層、義工等歡聚度佳節。向長者送上關懷和溫暖之外，鼓勵佢哋擴闊社交圈子，聽講一班義工已經去過多個地區，同近1,800位長者一齊過節㗎啦！