項明生推P圖App 高登票選男神做宣傳

男士都貪靚，吼準呢個需求推產品，自然多人Like。好似《晴報》專欄作家項明生（James）又有新搞作——打造亞洲首個男士P圖神器App「男神帥帥」。James話以前想用「美圖秀秀」改圖，怕尷尬都會喺枱底進行，效果又太夢幻同女性化。佢同花店Cheers創辦人鄒月梅（Twinky）講起，一拍即合，Twinky投資100萬，由科技公司研發約一年，新App個幾月前終於面世。

為咗宣傳，James同高登CEO林祖舜合作，推男神比賽，用男神帥帥P靚個樣，再上載到官方fb專頁或者IG，就可以參加。比賽由高登「巴打」票選、fb likes及評判每月選出一位男神，12名入選者年終進行總選，勝出者可獲逾10萬元獎金獎品兼做代言人。