90周年校慶 King's校呔一度賣斷市

最近經常聽見男友打電話畀舊同學，佢之所以咁熱心，皆因明年係佢母校King's（英皇書院）90周年校慶，今個星期六（1月2日）會喺會展搞十年一度的盛大Party。向來對母校歸屬感爆棚嘅佢，近日相當積極叫同學報名。

著名音樂經理人兼《令你震驚的健康真相》系列書籍作者梁柏濤（Pato）亦係King's仔，黛安早兩日同佢傾起校慶一事，佢仲介紹咗King's校長陳胡美好（Nancy）畀黛安認識。

CY都會出席

Nancy同黛安講，其實90周年校慶活動早於上月展開。當時校方訂製咗一批90周年紀念呔連社章畀校友預訂，殊不知幾百條呔好快就賣清光。事關好多校友出席活動嗰陣，都會打番條英皇校呔亮相，今次仲要係90周年紀念版，所以特別搶手。

黛安不忘向校長八卦，星期六的Party有邊啲著名校友出席。佢透露，包括特首梁振英、長和副董事總經理甘慶林、TVB前行政主席梁乃鵬、其弟兼瑪嘉烈醫院前行政總監梁乃江，以及祈福新邨所屬的祈福集團董事長彭磷基等都會以校友身份出席。

記得男友向黛安提過，06年King's 80周年校慶時場面好熱鬧，總共筵開140圍。而據校長所講，目前報名情況接近100圍滿，如果校友想參加，呢幾日都仲可以報名㗎！