名廚教路 剩食變上菜

「咦，嗰位咪特首太太？」昨日黛安陪媽咪行工展會期間，見到梁振英太太梁唐青儀。記得佢早兩日先陪CY來過Shopping，唔通佢未買齊嘢要再來？

原來梁太是日專程來支持NGO「齊惜福」的活動。眾所周知，呢個組織兩年前由佢創辦，目的係鼓勵市民減少廚餘同浪費。為咗令人關注議題，梁太昨日找來「Gigi姐」黃淑儀、《晴報》專欄作家兼藍帶名廚陳彥琳（Alvina）同米芝蓮大廚鄭錦富等，即席示範將廚餘變上菜。

黛安最鍾意Alvina的食譜，沒想過湯渣豬肉，加上乾蔥、蒜頭及蛋黃醬等簡單材料，再灑少少鹽和胡椒粉，即變成法式肉醬，塗上餅乾上吃，賣相甚佳，連梁太吃過也讚口不絕。而Gigi姐亦好厲害，兩、三下手勢將時菜、冬菇蒂煮成一道仿肉球。

是日CY細囡頌欣亦有陪媽咪出席，事後仲一齊參觀工展會內的廚餘機和展覽攤位。黛安仲留意到，母女倆都着住對Platform Shoes，雖然顏色唔同，但一看就覺得是「母女鞋」呢。