H&M家品部 下月銅鑼灣開張

全亞洲最大、佔地47,000呎的H&M旗艦店，下月於銅鑼灣恒隆中心正式開張，黛安相當期待！事關這間旗鑑店唔單止大，有四層樓咁高，仲首次引入「H&M Home」家居系列部門，以後去H&M，買衫之餘，仲可以買到咕𠱸、窗簾、被鋪寢具及各類型的裝飾擺設！黛安收到風，今個秋天H&M會引入着重針織紋理及手繪圖案的家品，讓大家為生活加添變化。

網站率先朝聖

雖然實體店下月先正式營業，不過黛安打「H&M Home」搜尋，已經搵到香港區的網址。家品價錢同平日H&M賣的衫一樣走大眾化路綫，花款多多的咕𠱸套由40幾蚊起有交易；一幅長250厘米、闊120厘米的圖案窗簾大約200蚊，上網愈睇得多，就愈想行下實體店！

除了家品之外，旗艦店仲同普通門市一樣，有售賣男、女裝、童裝、內衣及運動服裝。唔知新張期間有無優惠益大家呢？