去皇室堡抱抱My Melody

Sanrio今年真的很多活動，前兩日行街，黛安見到有的士車身貼上可愛的卡通人物My Melody同Little Twin Stars。原來是兩款卡通40周年活動之一，皇室堡同快的合作，幫的士「換新衫」，即日起到8月底在全港巡遊，不知粉絲們捕捉到嗎？

搵齊3個商場影相位

同公關老友傾開至知，原來銅鑼灣三個商場皇室堡、銅鑼灣地帶及東角Laforet，今個暑假分別打造了「花園派對」、「花圃慶典」及「生日舞會」主題裝置兩款卡通慶祝，其中皇室堡特別開設40周年限定店，搜羅了各款獨家產品，好似頸鏈、手鏈、鎖匙扣、T-shirt同環保袋等等，總之梗有一款會是心頭好咁話，睇嚟粉絲荷包要帶足彈藥至得！

Shopping之餘，點少得同心愛卡通影番輯靚相？三個商場各有不同影相位，好似皇室堡的秘密花園，有齊My Melody同佢嘅好朋友；東角Laforet的三米高星光蛋糕舞台就有着住晚禮服的Kiki同Lala。同大型布置影相覺得唔夠喉？今個星期六下午仲有個特別環節，分別是「My Melody抱抱會」同「Little Twin Stars抱抱會」，大會當日下午一時會派發「拍照證」，每場名額30個，粉絲要把握機會喇！