與Hello Kitty結伴同遊昂坪360

「葉問體驗館今個月底將會開幕！」上星期食飯遇上昂坪360公司事務總管劉淑儀（Vicky），原來伊人最近忙住籌備連串推廣本土文化主題活動。呢邊廂八卦緊「宇宙最強」會否出席開幕先？那邊廂又有新搞作，黛安收到消息，昂坪今次會同Hello Kitty crossover，推出「Hello Kitty開心萌遊昂坪360」，其中有15架纜車會變身Hello Kitty主題車廂，纜車車飛都會印上Hello Kitty肖像，Kitty迷有福啦！

此外，為咗體驗大澳水鄉特色，連Hello Kitty都帶埋Dear Daniel一齊見證，有百年歷史的大澳水上婚禮。聽大澳文化專家龔偉興講，水上人嫁娶活動因儀式煩瑣，依家已沒有正式舉行，只有每年11月大澳鄉委會主辦水上婚禮，重演當年儀式。

有人氣卡通做「生招牌」支持，昂坪360市務總管李詠姚話，一於約定大家同Hello Kitty齊齊喺昂坪360歡度聖誕和新年，仲話可乘機將充滿特色的大澳水鄉風貌、傳統習俗、漁村特產等介紹畀世界各地遊客。