中環街頭 睇飛天馬戲團

噚日食晏行過香港電訊中環旗艦店，突然出現兩位「赤膊上陣」肌肉男，見到領先市場推廣董事張儀玲（Catherine）先知，兩位在街頭即興表演的型男，係來自《飛天離地絕技團》的神級大力士（Strong Men）Mark Flores同Nikolay Nikolov。Catherine話，今日兩位Strong Men會喺港九新界出沒，好似太平山頂、荷里活廣場同跑馬地馬場等，為市民表演挑戰地心吸力，大家見到一定要捉住大力士影番張相。

「野生捕獲」大力士唔成功都唔緊要，Catherine話，今個聖誕節《飛天離地絕技團》將會來港演出，送上「前所未有的高水平」馬戲表演。兩位肌肉男就話，聽講香港人喜愛緊張刺激娛樂節目，更說：「我們將為觀眾傾力呈獻精采雜技表演，期望能為聖誕佳節增添不一樣的色彩！」

THE CLUB會員 優先訂飛

Lunchbox Theatrical Productions行政總裁簡就成（James Cundall）透露，《飛天離地絕技團》係嶄新節目，結合傳統馬戲表演，加埋小丑、空中飛人及電單車鐵騎士的火速飛車，驚險萬分，保證大家腎上腺素會直綫飈升。

黛安仲收到風，香港電訊獎賞計劃THE CLUB會員，可以優先訂票，仲有票價優惠㖭！香港電訊集團董事總經理執行顧問林綺華話，會員可用積分或現金，以九折優惠換購開幕夜、VIP區及其他門票。