狗狗遊戲機 過關請食嘢

有無試過玩手機嗰陣，屋企隻狗狗突然撲過來想玩埋一份？或者你可以買呢部遊戲機畀佢玩。

由寵物愛好者組成的美國公司CleverPet推出一款狗狗遊戲機，上面有三個發光按鈕同一個喇叭，狗狗可以按指令撳着燈掣，或者捕捉不斷移動嘅發光按鈕，過關後遊戲機就會投下食品做獎勵。

CleverPet創辦人Leo Trottier認為，人已經擁有太多電玩，但寵物仲未有，佢認為平時被獨留在家嘅狗狗，都應該要「有啲細藝」。

即使主人唔喺屋企，亦可透過遊戲機嘅應用程序，遙距觀察狗狗係咪打緊機，仲可以因應佢玩得叻唔叻，調整遊戲難度。呢部狗狗遊戲機售價為299美元（約2,332港元）。你會考慮買番部畀屋企隻寵物玩下嗎？（詳情：http://getcleverpet.com）