享譽國際的腎科權威李錦滔教授（Philip），1983年開始行醫，是威爾斯親王醫院內科及藥物治療學系顧問醫生、香港醫學專科學院副主席、香港中文大學醫學院榮譽內科教授，及香港中文大學余宇康及余雷覺雲腹膜透析研究中心主任。他醫治無數慢性腎病、透析及腎移植病人，致力促進國際和本地對腎病的治療、科研及教育，努力提倡器官捐贈和腎移植。
李教授成就斐然，曾獲多個「貢獻獎項」，是亞洲首位獲得美國腎科學會頒發 Belding Scribner終身成就獎的醫生，並先後被北京大學、南京大學、復旦大學，以及美國、日本、瑞典等多國著名大學邀請當客座教授。他自小已立志要成為一位醫生嗎？他說：「我屋企好基層，父母對我當然有期望，但我都會督促自己，自細自律地無論讀書及處事各方面，都努力做好佢。父母都想仔女長大成人、有好嘅教育、有好嘅職業，喺我哋成長嘅六、七十年代，我相信所有父母都希望咁，我哋係一個基層家庭，父母未必喺正式學問方面教到我，但做人方面就教懂我要誠實、正直、幫助人，但係咪好早就知道自己想做醫生呢？又真係唔係。」
小學就讀慈雲山聖文德小學的他，中學升入九龍華仁書院，並於中五那年成功申請教育司署的獎學金，到英國入讀世界聯合書院（United World College）兩年，「嗰時學校位於威爾斯（Wales），叫做大西洋書院（Atlantic College），我哋同學叫佢做AC。嗰年係1976年，全港有9個學生申請到獎學金，1個去新加坡、 3個去加拿大、5個去英國，而我係其中一人。當年教育司署負責遴選，但費用方面就由善長們捐贈。捐畀我嗰位善長，係利銘澤先生、即利希慎先生嘅仔。我仲記得出發去英國前，利銘澤先生叫我上利園酒店辦公室見面，最記得佢問我將來想做乜，我話想做律師，可能我覺得自己口才都OK、英文都OK啦，但其實我係讀理科嘅。到我去咗英國入讀AC，United World College其實係考國際文憑試（IB）嘅，所以我係香港最早考IB嘅人之一。我喺1978年考IB，用IB嘅成績返香港報讀香港大學，然後入咗醫學院。」
留學英國的兩年，令李教授清楚自己喜歡做醫生多過做律師，「因為學校近卡地夫（Cardiff），我會去Cardiff University做Research Project，當中同生物及醫療有關，所以我並唔係自小立志做醫生嘅！」
我問：「咁你信唔信命運？」
他說：「我都相信，我唔敢講自己會去改變命運，但我係一個有行動力嘅人，有諗法就會行動，會去做好佢。近年我對佛學有興趣，其中一句我幾鍾意、亦都相信嘅就係『一念起、一緣生』，即是你有一個念頭想去做好一件事，嗰個緣份就可能嚟、機會就嚟，但要去做先得，有念頭而唔實行嘅話，其實係唔會發生。」
機緣下成為腎科權威
李教授成為享譽國際的腎科權威，都是一個機緣，「喺威爾斯接受內科培訓期間，要輪轉做唔同嘅科，我做過腎科、腸胃科、心臟科、內分泌。個機緣係，做唔同科嘅先後啦、跟嘅老師係邊位啦、做唔同科時候嘅經歷咁，仲都要視乎你想做嗰科有冇位。呢幾樣嘢加埋，先會清楚邊一科係我想選擇嘅。此外，我選擇腎科有幾個原因，係從科學上，腎科好學術性，會幫人洗腎、換腎，即係做介入治療（Intervention）嘅嘢，同一時間亦都是好學術性，好多Research要做。『人』嗰方面，腎科、尤其是早期嘅，病人數目相對冇咁多，我差唔多叫到晒所有洗腎及已移植病人啲名。我睇住好多病人由最初期嘅腎病，到有啲需要去洗腎，又有啲好彩可以換腎，跟住過番一個正常嘅生活，甚至結婚生仔，我見證同一個病人整個人生過程，有啲甚至已經認識咗30年，佢會帶仔女嚟見我，甚至有啲熟到嫁女都請我去飲，所以無論喺人性化定係科學上，腎科對我嚟講都比較吸引。」
他亦指出腎病病人，很多時也出現其他病患，或許導致心臟、腦、腸胃等健康受影響，「所以我哋腎科醫生，要認識唔同嘅身體機能，可以話係處理緊『全人健康』。我醫咗病人差唔多40年，我哋每個月都會開一個關於病人嘅會議，為每一位需要洗腎嘅病人做評估，除咗醫療上，我哋會有社工講述病人嘅家庭背景，例如婚姻狀況、仔女、職業、收入咁，睇吓有幾多需要公援及其他支援。現在有咁多慢性病，其實照顧者嘅壓力都好大，我哋要關顧社會，包括係病人及佢哋嘅家屬。」
談到難忘的治療個案，李教授分享了一個年輕女病人的經歷，「廿幾年前，有一個唔夠20歲嘅女仔，佢由最初腎病，到後情況轉差必須洗腎，可惜勸極佢都唔肯接受透析、唔肯去洗腎。最後，佢去到好差好差先至肯入院，我哋極力搶救都救唔番佢。」我問教授為何那個女孩子那麼抗拒洗腎，教授坦言：「雖然佢有接受正常嘅教育，但始終有啲病人接受唔到自己有病，佢面對唔到，尤其是年輕病人有所謂不死意識，覺得自己其實冇事嘅，你要佢做介入治療，要洗腎或者做手術，佢會唔願意，所以唔係你想醫人，人哋就會俾你醫！」
- {{hket:inline-image name="p33.jpeg"}}{{/hket:inline-image}}
- {{hket:inline-image name="00.jpeg"}}{{/hket:inline-image}}
- {{hket:inline-image name="3.jpeg"}}{{/hket:inline-image}}
- {{hket:inline-image name="2.jpeg"}}{{/hket:inline-image}}
- {{hket:inline-image name="6.jpeg"}}{{/hket:inline-image}}
- {{hket:inline-image name="4.jpeg"}}{{/hket:inline-image}}
- {{hket:inline-image name="666.jpeg"}}{{/hket:inline-image}}
推動器官捐贈 成立生命之樹花園
病者及照顧者的身、心健康需要關顧的同時，醫者的情緒又應該怎麼調節？李教授坦言：「行醫咁多年，我一向嘅原則就係關顧病人嘅同時，我會喺某個程度上有所謂嘅Segregation（分隔），去接受，然後疏離。例如剛才例子咁，我會Feel Sad但唔可以持續好耐，唔可以拖垮自己嘅情緒，以免影響其他病人嘅治療。咁有冇啲既開心、又振奮嘅治療個案呢？當然有啦！遇上一直搵唔到病因嘅病人，但經過我哋診斷後搵到答案、醫番好佢、出到院，呢啲個案多不勝數。生命之樹花園（Tree of Life）、推廣移植、推廣捐贈亦都係我其中好重要、好想做嘅嘢。」
香港威爾斯親王醫院於2010年12月19日成立「生命之樹花園」，以紀念器官捐贈者的無私大愛。13年過去，當年栽種的幼苖，已變成了茁壯大樹。李教授把我帶到紀念花園，在大樹的護蔭下，他道出了當中的意義：「2009至2011年，我做緊香港移植學會嘅主席，同一時間我亦都係威院嘅副院長。當年我有個Plan，好想在威院成立Tree of Life，於是搵咗余宇康教授及香港移植學會捐錢及捐贈『盛放（Blooming）』雕塑，喻意接受器官捐贈後生命嘅燦爛及美麗，同埋標誌住器官捐贈令到他人生命重燃希望。我哋亦專誠捐出兩張凳，等大家可以坐喺度欣賞及思巧生命。記得Opening當日，我哋邀請多位威院腎臟移植嘅捐贈者家屬及受贈者出席，實體以外，網站上亦設有『毋忘我‧頌新生』網上紀念公園，等受贈者利用網上表達對捐贈者嘅感謝，亦令到捐贈者家屬感受到生命嘅延續。」
談勤奮和情緒管理：忙但不覺辛苦
李教授致力推動器官捐贈，他時常說一個人死後可以捐出的各種器官隨時能幫助10個人，也等於幫到了10個家庭。現時香港器官捐贈的數字不甚理想，但2015年的一幕，為他和團隊帶來很大力量，「當時我哋算好彩，團隊喺4日之內換咗6個腎。有3個人捐，然後可以幫到6個病人，令到成個團隊好振奮。嗰次我哋將佢推廣畀社會大眾，大家都好接受，記得當年嘅捐贈數字因此而增加咗。」
李教授的勤奮和情緒管理很值得我們學習，但勤奮和情緒管理從來不是對等，他分享經驗：「我做咗咁多年人，或者作為一個醫生，其實勤奮嘅人未必一定管理得情緒好好，我成日同我啲團隊講，我好忙，但我唔覺得辛苦。你明唔明個分別？我係好忙，但其實我做得好開心。」
「如果工作好忙但覺得辛苦，代表嗰個人冇咁愛佢嘅工作？」我問教授。
教授客觀分析：「做一件你有興趣嘅事，就一定會做得好，如果冇興趣嘅話，其實好難成功。你做嘅嘢係你感興趣嘅，而嗰樣嘢又幫你搵到錢，梗係拍晒手啦，但如果嗰樣嘢搵唔到錢呢，其實你都贏咗嗰喎！要搵到自己Enjoy嘅工作你知道有幾難嗎？」
其實工作以外，尋找令自己享受的興趣就容易得多，但把興趣提升到專業層面，卻又未必人人做得到。李教授說：「我係一個音樂劇團『演戲家族』嘅主席，我一直好欣賞藝術工作者，包括我哋團隊做創作同表演藝術嘅，他們的水準非常之高。佢哋唔會覺得我咁樣講有貶意，佢哋喺收入方面、作為一個全職工作，係唔太豐厚嘅，唔係誇張，亦都唔係秘密，但我真係好欣賞佢哋瞓身去做、去表演，呢個其實係佢哋嘅Joy、係佢哋嘅興趣，佢哋做得好，然後得到觀眾嘅掌聲，中間嘅過程佢哋Enjoy。有時候我都好驚訝，你都有去睇話劇、音樂劇吖，啲歌詞而家打埋出嚟，而演員們真係一字不漏、冇錯嗰喎，呢個Inspire到我喺過去超過10年，演講時盡量唔睇稿，盡量啦，但我最近攞獎嗰次都有睇，比較Serious嗰啲（場合）而我怕唔記得我會睇吓。」
由倫敦睇到「四川」 從藝術回到工作
他對音樂劇的熱愛，要從大學時代說起，「大學時代我會攞住本《號外》雜誌行嚟行去，呢啲係文青嘅身份象徵嚟㗎，嗰時已經開始睇音樂劇。唔知你有沒有聽過宋豪輝呢個名，7、80年代，宋豪輝有個音樂劇叫《登龍有術》，我好鍾意。之後一路讀大學、然後做嘢我都繼續有睇。 88、89年我去倫敦做咗1年Research兼深造，嗰年我每個禮拜最少睇一套Musical或者話劇。我當時喺Hammersmith Hospital深造（現叫：Imperial College），當時Hammersmith係Royal Postgraduate Medical School，我係研究生（Postgraduate Student），所以有學生證可以買平飛，整個倫敦最有名嗰堆《孤星淚》 (Les Misérables)、《貓》（Cats）、《歌聲魅影》（Phantom of the Opera）、《星光列車》（Starlight Express）等等我都睇晒。」
回港後，李教授對音樂劇的熱愛有增無減，他印象最深刻的是2003年「演戲家族」於葵青演出的《四川好人》，「佢改編自德國著名劇作家布萊希特（Eugen Bertholt Friedrich Brecht）嘅作品，呢齣劇個班底好出色，作曲高世章、填詞岑偉宗，仲有導演彭鎮南，佢哋就係『演戲家族』鐵三角。我自認都算睇得多（劇作），都分得出邊啲得、邊啲唔得，加上呢個係Original，全部自己作曲、作詞、表演，好打動到我！『一念起、一緣生』，我當時係腎科學會嘅主席，我有個念頭想包場畀我啲腎病病人睇，咁我就喺中場時走去拉住個導演，我話：『彭生，你唔認識我，我係李錦滔醫生，我好鍾意你個劇，唔知會唔會重演呢？如果重演，我真係好有興趣包場畀我啲腎病病人睇。』嗰時未有WhatsApp，我哋交換電話，之後就同佢聯絡。半年之後，佢哋真係喺荃灣大會堂重演，最後我哋成功安排咗一千個位免費畀腎病病人欣賞。」
他相信緣份、相信命運，再配合行動力，好的事情就會發生，「我同『演戲家族』包咗1場，我哋當然熟咗啦，過咗幾年，『演戲家族』就邀請我加入董事局，我話好呀，我唔識但我有興趣加入。再過咗幾年，佢地話不如你做我哋主席啦！咁多年嚟，我聯同腎科學會包咗不下6場。」我問他要兼顧劇團主席一職，可感到辛苦，他笑著回答：「唔辛苦，其實喺香港做業餘劇團係困難嘅，而家主要靠藝發局資助，我會幫忙去聯繫一啲基金會及支援，而家我會聲稱自己係半個業界人士。我喺威院做咗18年副行政總監，行政上我都有啲睇法嘅，我覺得搞藝術嘅人有時候未必好叻行政，所以有時我啲行政思維可以幫到佢哋。」
其實李教授的藝術思維，也在日常行政及科研上大派用場，「去醫人、做研究、寫論文都一樣，要投入，要專注。另外，講書都係一種表演藝術，你講得好，已經係一個表演。耐唔中有人會問我：『你做主席，咁會唔會去表演下？』我就打趣地答：『冇呀，但我日日返工都做緊！』」
醫院為「第二生命」 跟隨內心所想
李教授1985年開始在威爾斯親王醫院工作，至今接近40年。他帶領我參觀醫院時，每個角落都有著他的回憶，條條通道都有愛，「呢間醫院肯定係我第二生命，我冇嘢做就會返嚟、星期六日都返嚟，我覺得喺呢度做嘢會順暢啲、又靜啲啦。而家數下數下，喺呢間醫院做全職時間比我長嘅醫生…可能冇！沈祖堯係我醫學院同班同學，佢最初做病理科、比我早少少入嚟工作，到咗85年我哋一齊入內科。佢現在已經離開香港，而其他同班同學都冇人喺威院做全職喇，我喺呢度最耐！」
工作勤奮、專注、上心；興趣專一、專業、感恩，全是重情、投入、堅毅、仁愛的表現。一個地方把人才留住了40年，而又給他最大的舞台去發揮，就是相輔相成。李教授說：「我好幸福，好Blessed，我係一個都幾學術嘅人，如果唔係一間Teaching Hospital（教學醫院）嘅話，應該留唔到我咁耐。教學醫院可以畀我做科研、去講書、做學術交流，感覺好好。」
很多人對未來充滿希望，我們身邊當然也不乏負能量者。李教授寄語各位《晴報》讀者：
「大家最緊要Follow Your Heart，想做就要努力去做好件事，然後Celebrate Success。呢個年代少咗『有麝自然香』㗎喇，你明唔明？重點唔係叫你去標榜啲乜嘢，也不是炫耀，而係你要話到畀人哋知你及你團隊嘅好，如果唔係就如『錦衣夜行』，你哋著住最靚嘅衫但黑媽媽出嚟行，邊個會知道呢！仲有另一句 — Join The Winning Team，乜嘢叫做Winning Team呢？當然係要有Success，等於我歷年來嘅國際關係及獲得嘅獎項，重點喺工作上其實都幫到我哋Team嘅同事，如果一個人只係埋頭工作而唔Reach Out，對事業唔會有幫助。最後，整個核心價值就係幫到病人、幫到同事、幫到自己。個人方面，其實開心、唔開心都係睇自己。你對自己嘅要求，同周圍環境嘅影響有幾大，其實你自己可以Adjust到，好多事情只要你諗闊一啲、諗開一啲，未必真係咁差。另一個例子，我幫下屬寫工作評核時，會提醒佢哋唔好為咗想3年後升職，所以我現在做乜做乜，其實係應該調番轉，而家做你個心想做嘅事，而係覺得幫到病人又好、幫到個System都好，你做到成績、3年後因為咁樣而升職，你咪拍晒手囉！3年後你冇得升職，你做到呢啲嘢，你都幫到病人、幫到同事、幫到自己，其實你都冇輸。」
撰文：陳小芝
編輯：陳潔雯
攝影：馮凱宜
立刻加入《晴報》WhatsApp頻道，獲取最新娛樂、健康及著數資訊，仲有送禮活動！
【https://bit.ly/3RnCHkV】
↓U Lifestyle App睇盡《晴報》新聞資訊及自家節目↓
↓↓同步更新、更快更順↓↓
【免費下載】