鐵馬家族丨林子善偏心唐詩詠老婆冇詐型 慳妹對哥哥從不計較付出：最錫佢

鄭嘉穎、馬國明、黃嘉樂、唐詩詠同林子善2009年因為合作拍攝劇集《鐵馬尋橋》而結緣，幾人更組成「鐵馬家族」，經常搞聚會大家感情一直都超好。雖然早前大哥鄭嘉穎發表咗「婚禮唔到」宣言，不過仍然無損佢哋嘅感情，日前林子善就同細妹唐詩詠「放閃」，感情真係仲好過親生兄妹。

同場加映： 新聞女王丨李施嬅被斷錯症眼睛開手術後回不去 無奈接受被嘲整容：靠打坐學感恩

{{hket:ul-video id="9796"}}{{/hket:ul-video}}

林子善同黃嘉樂、唐詩詠等日前去到蘇梅島參加馬明同湯洛雯婚禮，而子善、嘉樂同詩詠去到異地都不忘做運動，三人帶埋跑鞋「齊相齊落」，子善post出二人合照，有感而發：「《偏心篇》有好多朋友同網友會講，子善你偏心錫阿妹（唐詩詠）多啲，好肯定話俾你知，絕對係！因幾兄弟初開始嘅時候，幾個阿哥都以佢為中心，所以大家問佢哋每一位，最錫邊個必定係講阿妹，只係我會錫到出晒面啫。」

{{hket:inline-image name="3.jpeg"}}{{/hket:inline-image}}

子善大讚詩詠，一直以來都為大家做咗好多窩心嘅事，續指:「就好似今次二哥嘅婚禮，早早已經幫我安排行程，幫大家安排時間買機票。婚禮前一兩日食啲乜嘢，三哥生日又準備定蛋糕，又請大家食豐富海鮮餐……佢出晒名係一個慳家妹，但對我一向都從不計較，大家就會明點解咁抵錫。」子善又稱自己好愛呢個「大家庭」，而佢同妹妹都有跑步呢個共同興趣：「出發前我問有冇帶架生，佢話阿哥梗係有帶到啦，全程山路跑咗唔係好耐，跑到三哥同我真係斷氣，但開心感恩天給我機會，同阿妹三哥旅行一齊跑，我哋大家都要身體健康，希望每次去旅行都可以，去到當地周圍跑下影相。」

錫細妹錫到出晒面，仲連開兩個post同細妹「表白」，好彩子善太太都冇呷醋，仲有like子善呢個post添！事關詩詠都愛屋及烏，同時會好照顧阿嫂，呢個女仔認真唔話得！唔少網民都為詩詠感到心急，奇怪一個咁好嘅女仔都仲未遇到真命天子，留言：「希望佢都快啲遇上Ｍr.right，婚禮時又可以一齊再玩。」、「希望你阿妹早日搵到住好人家。」大家又表示好羨慕佢哋之間嘅情誼：「你哋好sweet好cute哦。」、「非常鍾意你哋兄妹感情！」陳敏之都留言：「可能親生嘅妹（兄）妹都冇你哋咁好感情！」

圖片來源：Instagram