管家王｜手打絲棉被老店屹立半世紀 女兒無悔捨夢想守業 堅持背後只為家人

「呢間舖連繫我哋屋企人感情，一下子結業太可惜......」屹立石硤尾56年的協義興繡莊，是自60、70年代起做手打絲棉被的老字號，早年因父母離逝令繡莊面臨結業，第二代傳人林美倩（四姨）決定放棄「揸車夢」獨力守護家業，面對時代巨輪，四姨認為撐至今天已不負所託，盼母親能引以為榮：「好辛苦好辛苦，但好值得。」

{{hket:ul-video id="9880"}}{{/hket:ul-video}}

協義興繡莊在1967年開業，初期有裙褂租借、售嫁娶用品、床上用品等，當中以手打絲棉被為街坊熟悉，第二代傳人四姨林美倩在2003年繼承家業，轉型只專注售賣手打絲棉被和提供補蓆服務。

林美倩因為在八兄弟姐妹中排行第四，故人稱四姨。她自言小時候不愛讀書，反而喜歡放學後到舖頭幫忙，八兄弟姊妹分工合作，有人負責燙金、有人壓花，製作一籃籃襟花賣給酒樓作婚宴裝飾，「舊陣時無咩娛樂，放學返去幫手穿吓襟花咁就一日」。

家業興旺年代

四姨一家由做襟花起家，慢慢發展成繡莊，六、七十年代正是繡莊生意最蓬勃的時期，每當接到客人訂單，便由她做跑腿去深水埗海壇街找師傅打被，直至1981年繡莊搬到石硤尾邨，轉而聘請師傅在舖頭打被，未料令生意越來越好，每天更聚集一群街坊在店圍觀，

「本來只係一個星期打一日，點知後來好好生意，打足7日，門口企滿晒人睇。」

抗衡時代巨輪 為家業放棄「揸車夢」

後來父親早逝，生意由母親主理，兄弟姊妹抽空輪流幫忙，但隨著各自成家立室、出國留學及移民海外，至2003年母親病重離世，兄弟姐妹需決定店鋪去留。由於店舖生意大不如前，家人均有意結業。

四姨自言年輕時其實有個「揸車夢」，最喜歡駕車到處走，甚至想以揸的士為職業，「未有車牌嘅時候已經想揸的士」，既可以遊車河又可以賺錢，故一成年便考獲車牌。不過四姨為家人終決定放下夢想，盡力守住家業，

「呢間舖頭可以連繫我哋屋企人感情，因為有舖頭喺度，佢哋就會多啲返吓嚟。咁多年歷史同心血，一下子話唔做就摺咗去，好可惜……」

四姨自此接手打理繡莊至今，與姨甥女豆豆一同經營，在店鋪中央位置設置長枱親手打絲棉被，兩人每天最多可打3張，一年下來可製成數十張手打絲綿被。而手打絲綿被這門傳統手藝亦吸引中外媒體報道，令生意漸有起色，查詢電話不斷：

「『我』周圍搵打絲棉被嘅（舖頭），當時我媽帶過我去邊度邊度，睇住人哋打㗎；『我』好鍾意嗰啲被，我唔鍾意羽絨㗎，你哋地址喺邊度啊……」

當中甚至有客人因為殘舊絲棉被是嫁妝、具有紀念價值，希望四姨幫忙「翻打」保留。 

儘管如此，隨著時代發展，買手打被的人越來越少，生意越來越難做，被問到豆豆會否繼承繡莊時，四姨黯然搖頭，只因她認為手打絲棉被終會被機器完全取代，加上行業今非昔比，一旦屋邨重建也難再負擔如此大間店舖租金，繼續堅持只怕「連累」豆豆，

「清拆之後，無可能再同房署租到咁大間舖……如果新鋪面積有呢度咁大，一定唔會係而家呢個租金。租金一貴，我哋就做唔住，唔理你幾耐歷史都玩唔到㗎……」

回想這些年，四姨哽咽指「過得唔容易」，形容經營繡莊「賺返嚟嘅錢，都係揼石仔咁揼返嚟」，每天回到舖頭都不停手，埋頭苦幹密密做。憶起這些年與老店相依為命，背後辛酸讓她眼泛淚光，四姨直言不諱 「好辛苦好辛苦，但好值得」。

立刻加入《晴報》WhatsApp頻道，獲取最新娛樂、健康及著數資訊，仲有送禮活動！
【https://bit.ly/3RnCHkV】

U Lifestyle App睇盡《晴報》新聞資訊及自家節目 ↓
↓↓同步更新、更快更順↓↓
【免費下載】

撰文：黃堯姿

拍攝：林君茹 何家賢