劇集《你好，我的大夫》中幾位年輕中醫師熱血有抱負，卻總是被病人輕視，感覺「未夠班」難以服眾。今次吳偉豪、孔德賢（Danny）及游嘉欣等TVB年輕一代演員獲監製起用，為大家帶來新鮮感的同時，亦要面對觀眾的好與壞評論。面對TVB演員「換血潮」，明白要讓觀眾受落需時，他們為著對演戲的熱愛，博盡為角色用盡百二分努力去演，希望總有一天得到大家的認同與支持。
吳偉豪、Danny和游嘉欣在劇中飾演中醫師，雖然Danny比他們資深幾年，但仍然難以打破大家對中醫師信心的傳統框框，問到「六君子」當中誰是最「藥煲」的一位？他們異口同聲都笑陳嘉慧，吳偉豪說：「之前合作拍《回歸》已經覺得她好弱，腸胃炎、頭痛加失聲，每次開工見到佢都覺得佢好辛苦。」至於養生方面，大家都讚年紀最輕只有23歲的游嘉欣，除了睇中醫調理身體外，她放假都會去岩盤浴、做Facial或者運動，忙過不停只為養生。
你好，我的大夫丨陳嘉慧今日低調在內地舉辦婚禮 同屆訓練班姊妹見證接新娘儀式【下一頁】
游嘉欣因名字有「嘉欣」二字被列為美女名單，她認為叫嘉欣的女生除了漂亮之餘，個性都比較倔強同獨立，自己絕對是其中一員。Danny初入行被指是羅仲謙翻版，連吳偉豪都點頭認同，Danny說：「其實每次見到羅仲謙都覺得佢好有型，但我自覺不太相似，撞樣絕對唔係負面嘅事，似佢咁靚仔有型，絕對非常好啦！」吳偉豪則由「島大吳彥祖」變成「翻版李敏鎬」，吳偉豪笑言起初都不太覺得，直至朋友向他傳來李敏鎬的照片，發覺真的有點相似，他認為「翻版」沒有好與壞，最重要每人都凸顯到自己特色。
今次年輕演員在劇中擔大旗演出，他們坦言壓力不大，反而拍攝氣氛非常輕鬆，演員之間「互窒」成為捱夜的提神良方，他們自爆一邊拍一邊「增磅」，Danny大爆：「我睇Playback，見到吳偉豪同陳嘉慧一場鬧交戲，真係肥腫難分，因為嗰場戲係補拍嘅，塊面勁腫囉！」游嘉欣指由於拍攝期間，有不少演員過生日，於是戲裡戲外都經常「大食會」不斷進食致肥。劇組計算過幾位配角演員平均年齡只有25歲，Danny說：「我哋碰撞出嚟嘅火花，相信大家都有新鮮感，有一定可觀性，而家劇入面嗰份純真、直接，可能過多五、六年就冇呀喇！」
游嘉欣笑言角色要「扮傻」最難，身旁的吳偉豪都大笑，事關她真人都自帶傻氣，根本就本色演出。游嘉欣一向早睡早起，拍劇經常日夜顛倒，她起初需要時間去適應，不過自從拍過幾套劇之後，慢慢掌握節奏，習慣了這種生活。「入行第一部劇集就係小妹妹嘅角色，可能到而家播出嘅都仲係傻更更嘅單純乖女，我真係好希望有日可以演惡人！」Danny以往演紀律部隊較多，第一次拍劇《把關者們》，戲份不少但始終太新未夠經驗，「直至拍咗《大夫》同後來《本尊就位》，見識到身邊前輩思考好有深度同層次，令我更加沉迷去追求到底演戲嘅可能性有幾大，令我愛上演戲。」
你好，我的大夫丨彭晴望撞後腦網友估係劇情伏筆 劇照先爆眾醫師去喪禮有人要死？【下一頁】
Danny表示希望觀眾不會因為不認識年輕演員而抗拒睇劇，「希望觀眾愎慢睇到我哋嘅努力，唔止欣賞打拚多年嘅前輩成果，亦睇到年輕一輩為大家帶來嘅娛樂、歡樂同感動。」吳偉豪認為每位演員都有新人的階段，希望將來大家見證到他們成長變得成熟的時候。「我明白觀眾睇到我就會諗起朱凌凌，不過我自己每次接到新劇集新角色，就會好似新人一樣，洗牌重來，重新去處理角色，希望大家見到我係感受到另一個人，而唔單止係朱凌凌。」游嘉欣認為年輕演員的風格有所不同，希望帶來衝擊，令大家重新投入去支持香港電視劇。
立刻加入《晴報》WhatsApp頻道，獲取最新娛樂、健康及著數資訊，仲有送禮活動！
【https://bit.ly/3RnCHkV】
U Lifestyle App睇盡《晴報》新聞資訊及自家節目 ↓
↓↓同步更新、更快更順↓↓
【免費下載】
服裝：Kowloon City Boy（吳偉豪）、@moshi_ron（孔德賢）
造型 : @reactorange、@katherinenoodles（孔德賢）
攝影：陳健珊、何家賢
撰文：楊安莉