林作因涉JPEX風波,本周一(18日)被警方高調拘捕,直至19日才獲准保釋。據報道指,因事件暫時被拘捕的8人,必須在10月中旬到警署報道,而林作的保釋金高達數十萬元。林作事隔3日,今午在位於麥當勞道的居所開記者會,在范律師陪同下就事件六點作出回應。林作大方回應案情以外的問題,當中提到他被拘留期間的待遇,並暗示當中保釋後離開警署行後門的安排是配合警方。
同場加映:枱底隧道丨ERROR割席死腳膠賣錯式感情觀 許願集郵心中女神靠「全民追星」?
JPEX風波│林作靠女友掩護後門鬼祟離開警署 裕美5度助脫困打動未來奶奶【下一頁】
林作手持「貓紙」讀出聲明,「首先,我喺19號離開警署,暫時冇被控告亦獲准保釋;第二,我聘請咗資深大律師,獲得法律意見,基於事情調查當中,我唔會就案情相關嘅任何方面進行評論,無論係公關或私底下,本人都唔會作任何回應;第三,位於中環嘅辦公室已經喺前日中止咗租約,所有業務都已經中止咗; 第四,我知道好多人喺呢件事情上都十分之苦惱,我都一樣,我甚至面對更加多苦惱,但我選擇積極樂觀地面對,因為正如我偶像邱吉爾所講,『我係一個樂觀主義者,做其他嘢嘅人,似乎仲冇用。』我希望大家都可以一樣;第五,我有好多嘢想做、想幫,但目前基於事件仍然喺刑事調查中,本人有好多事情都唔可以做,到我有一日被還得清白之身,我承諾一定會盡力,喺我能力範圍內、法律容許下協助受影響人士。最後想講,未來我會盡力協助相關執法機構,直至事情水落石出,而家最能夠幫到受害者嘅亦都係咁,希望事情盡快得到解決,盡快將幕後人繩之於法。」
隨後林作開放提問,有記者問及「JPEX事件係騙局?」、「你係咪JPEX合夥人?」、「點解幫手宣傳?」、「你同其他協助調查嘅人識唔識?」等等案件相關問題,但林作都通通以涉及案情為由拒絕回應,直至有人問「呢兩日瞓得好唔好?」林作說:「我係瞓得好嘅!(會唔會道歉?)我認為喺我調查完結之後,被還得清白之身,我係會做我所有可以做嘅嘢,但一定要等事件告一段落。」
至於拘留期間的待遇,林作表示除了女友裕美為他購買的叉燒飯外,還飲到凍檸茶,至於為何離開警署時要走後門?林作說:「我會話警署期間我係配合警方調查同安排要求,任何詳情都唔透露,唔關案情事,但關警民合作事,我係合作啦,警署期間係一切都正常。(網民話你走後門龜縮?)我只會話係警署盡力協助警方,嗰個環境應該要配合。」
林作涉JPEX案今日驚爆被捕 曾主動聯絡警方提供資料【下一頁】
被問到現時財政狀況?林作表示:「唔想畀人感覺我財政狀況如何,我知大家好苦惱,我都苦惱,平時天跌落黎當被冚,但而家的確好煩惱,好多事情要煩。(臭格感覺?)係思考人生嘅好時候,(驚唔驚坐監?)我喺警署有聽到其實被拘捕人士喺監獄嘅經歷,我想講係比想像中有趣,我未入過去,我唔知道。」問到有沒有後悔這次生意的決定?他說:「呢個問題好哲學,人生應該點睇過咗去發生嘅事呢,我只可以講而家發生咗就勇於面對,就要盡自己所能去解決,我絕對有承擔。」
至於如何看待「虛擬資產」?林作認為法律上發展得很快,這一刻未有全面睇法,但會觀察同相信未來會有更多看法。問到林媽媽的想法?林作表示:「媽媽非常之擔心,對一個傳統家長角色,而家情況係非常之嚴重,唔係每個華人都明白『無罪假定』呢個概念,好唔好意思......好多網民話我正職係兒子,始終我媽媽得一個,媽媽又得我一個仔,佢點都係支持我,希望唔使令佢咁擔憂,點都要自己面對,(擔心你人身安全?)有人唔喜歡我、討厭我唔係第一日嘅事,我淨係希望更加多人睇到今時今刻,我係肯出嚟面對同擔當嘅人,我覺得我哋應該交畀法律制度去做調查,同埋還我一個清白。」
林作面對多次失敗,問到如何令大眾相信他?林作表示自己33歲,近48小時收到過最多祝福同支持的訊息,全部來自朋友、同事、前同事同眾多網民,令他意料之外的感動,當然有網友仍然落井下石,甚至多年來食花生食得最開心今次,「有心水清嘅網民話你睇緊一個失敗者,但佢可能係我哋之中最成功嘅失敗者,不斷失敗但都繼續行落去。」林作表示自己今年的高低起伏相當大,生活過得不容易,他說:「今年頭半年醉心保險事業,六月離職之前嘅公司,喺呢個地方做過一次記者會,嗰次大家已經覺得十分之大鑊,短短三個月內,低處未見低,發生今次呢個事件,人生跌跌伏伏,咁短時間內兩次,加上中間做大型眼部手術,至今視力都未完全恢復,仲剝埋四隻智慧齒,呢三個月我自己都唔好過,呢一刻當然最難過。喺9月我哋先租咗呢個中環辦公室,9月9日正式開幕儀式,今日9月22日,短短兩個禮拜唔夠發生咁多事,如果大家嘗試代入,可想而知我人生係幾咁不容易,但都係嗰句,發生咩事都要積極面對,希望大家都係咁過大家人生。」
女友裕美有現身,並大方合照,但就拒絕除去口罩以免倦容公開,對於網友大讚裕美是最佳女友,她說:「多謝!盡力!」反而林作說:「呢一點我絕對認同。」而她亦拒絕應傳媒要求找林媽媽合照,她說:「老人家唔會令佢咁煩惱啦!」
立刻加入《晴報》WhatsApp頻道,獲取最新娛樂、健康及著數資訊,仲有送禮活動!
【https://bit.ly/3RnCHkV】
U Lifestyle App睇盡《晴報》新聞資訊及自家節目 ↓
↓↓同步更新、更快更順↓↓
【免費下載】
攝影:馬駿傑
採訪:黃曉妍
撰文:娛樂組