朗豪坊「唱」遊中秋Moonlight Party 打卡/睇Show/免費暢飲+雙倍消費獎賞

政府正計劃搞旺夜市經濟，位於旺角地標之一嘅朗豪坊，由9月21日至10月23日，亦會啟動連串晚間活動及消費獎賞，包括將於4樓及13樓設置巨型月亮打卡裝置，營造整個月嘅中秋月夜氣氛，而9月29日中秋節當晚仲會舉行Moonlight Party，請來年輕新晉歌手舉行一連兩場免費音樂表演。商場亦會喺當晚派發免費酒吧飲品及應節燈籠，畀大家一邊飲一邊Chill住聽歌，由4樓玩到13樓。

黛安聽聞，商場於同期仲會推出《朗豪坊Moonlight Rewards》雙倍獎賞活動，每晚8點後，只要喺場內商舖消費即賞2倍LP CLUB會員積分；消費滿$400，可享4小時免費泊車優惠。此外，商場更會開設《朗豪坊x Snoopy戶外探險之旅》期間限定店，粉絲記得去朝聖喇。至於10月中至12月，朗豪坊亦會推出另一輪更豐富嘅「夜貓消費賞活動」，將夜經濟貫徹推動至2024年，詳情就要留意商場公布喇！