張致恒認泥足深陷搵疊碼仔借錢 不甘受網絡欺凌：禍不及妻兒

張致恒（Steven）與雯雯這對話題夫妻不時被KOL Sean IG直播爆料，早前爆張致恒周圍問人借錢，每口叫價由500元起；又公開疑似張致恒錄音聲帶，聲稱「老婆借咗10,000元嚟交費用，但嗰個人講明3日內唔還，要我老婆肉償」，更爆張致恒連老竇生果金都攞埋。而張致恒今日凌晨就「網絡欺凌」一事反擊，指自己一直「死撐」，又說「禍不及妻兒」，希望大家放過他的家人。

同場加映：寵愛Pet Pet丨何沛珈感激角色牽引走出喪母之痛 勤做主持演戲入屋：媽媽係我榜樣

{{hket:ul-video id="8916"}}{{/hket:ul-video}}

張致恒長文如下：

我想講嘅係網絡欺凌呢件事真係好嚴重，一件完全唔關任何人事嘅事，竟然可以俾一位網紅隨意欺凌，第一樣嘢係我完全唔識得呢一個人，亦都對呢一個人冇興趣，但係佢就一而再再而三咁樣網上欺凌我一家，其實佢係想點呢？係想睇到我哋一家自殺定係點樣呢？

我張致恒係曾經做錯過，喺呢四年裡面，整個人迷失到唔識行前面嘅路，入咗行咁多年嘅我，唔係話放低就可以完全放得低，所以當我冇任何辦法嘅時候，由朋友到大耳窿甚至乎澳門嘅疊碼仔我都借過錢，用盡任何辦法去借，因為我唔知道我可以點做，但係我越借就越泥足深陷，我嘅其中一個缺點就係當遇到麻煩事好容易就會選擇咗逃避，所以一直以嚟我都係做錯…

而家有咗小朋友，好努力去改呢一個缺點，但係都係好難，因為呢個世界總會有一啲X街想你死，講真…其實我真係好攰，一直以嚟死撐到而家，無非都係想見到小朋友快樂成長，曾經同朋友嘅聊天對話流出，我都唔多想回應了，首先第一樣嘢我冇用老婆嚟肉償，第二樣嘢我只係講我嘅小朋友當時未搵到學校，我好驚佢要讀特殊學校，並唔係嗰位網紅所講我個仔低b，第三樣我老竇佢一直都好擔心我，佢係曾經有將佢嘅生果金畀我做生活費，但係唔係個個月畀我，只係畀咗一兩次！

最後我好想講，一直都好努力搵機會亦都用唔同嘅方法去搵錢，因為我真係好想還曬啲錢，無奈何收入都唔夠屋企嘅支出，所以一直都唔能夠還畀借過錢畀我嘅朋友，想同你哋講聲對唔住，我會盡我嘅能力用最快嘅速度還返晒畀你哋，至於網絡暴力同埋網絡欺凌我就冇計了，只能夠講你哋要X你哋要笑就隨便，但係我懇請你哋要笑嘅就笑我好啦，禍不及妻兒，你哋要鬧我可以企喺度畀你鬧，你哋要笑我亦都可以企喺度畀你笑，但係觸碰到我家庭嘅任何一個人我就冇辦法容忍，雖然我唔知我有咩可以做到，但係我都會用盡辦法去反擊，因為我真係好愛我個家！」

張致恒被爆借錢手法層出不窮 搬全家慘況連老竇生果金都攞埋【下一頁】

撰文：娛樂組