迪士尼7月底實施新規 兒童露營車推車不可入園

近年坊間推出唔少兒童露營車同露營手推車，亦有家長帶埋呢啲車去迪士尼接載小朋友。但黛安收到風，香港迪士尼樂園由7月31日起將實施新規則，屆時不論尺寸大小嘅兒童露營車同露營手推車都唔可以入園，家長或其他需要使用有輪轆運送工具嘅人，需改為使用手推輪椅、不少於3個輪轆，並以步行速度行駛嘅電動輔助行動設備，或尺寸不超過92厘米x132厘米嘅嬰兒車；樂園內市鎮會堂旁嘅消防局就繼續有嬰兒車租用，大家去樂園玩時記得留意喇！

如果想玩得開心，入園時緊記唔好帶旗幟、橫額、標誌、有轆嘅行李，及相機或手機自拍棒；而風箏、小型無人機或遙控式飛行裝置等等，亦禁止帶入場㗎，大家一定要安分守己，守護彼此嘅遊樂體驗呀。