P&G夥香港屈臣氏推「塑膠再生」 轉廢為材作STEM教學

堆填區每日都有大量廢塑膠棄置，但回收率一向唔高，黛安知道，P&G與香港屈臣氏喺2021年開始合作推動為期3年嘅「塑膠再生」計劃，透過屈臣氏龐大嘅分店網絡，喺各區門市提供回收點，有賴市民嘅支持及參與，計劃至今合共回收逾36萬個塑膠容器，堆疊嘅膠樽高度，已相當於9座珠穆朗瑪峰或200棟IFC！

P&G與香港屈臣氏更夥同本地協創機構MakerBay Foundation轉廢為材，利用「塑膠再生」計劃與本地其他來源所回收嘅膠樽，重新融合後製成適合中小學用嘅3D打印物料，首階段將會送贈由回收塑膠生產嘅3D打印物料畀50所中小學用於STEM教學用途，令到呢啲塑膠可延續環保教育使命，實現循環經濟。佢哋更會走入校園舉辦STEM工作坊，融合科技推動環保教育，及透過理論及實踐啟發學生以創新思維面對環保問題，同時提升下一代嘅環保意識。