慶祝父親節去中環夏誌 寶萊塢派對＋夏威夷小結他節

夏日狂「熱」提早來襲，想父親節一家過得開心盡興，去《SummerFest中環夏誌》必夠fun。公關姊妹同黛安講，寶萊塢舞蹈教練Dee Oh周五晚率先喺添馬公園一帶領舞狂歡，中環夜景下跳出異國Bollywood風情，誓要全城投入Qintensity主辦嘅「Fit and Fun Night Out-Dance Party」。

緊接住嘅周六，更有歷年都大受歡迎嘅香港夏威夷小結他節上演，除咗添馬公園有大舞台開騷外，仲有遊戲攤位、音樂同手工藝工作坊，無論識唔識玩樂器，係爺爺、爸爸定係小朋友都可以參與，享受音樂散發嘅獨特魅力。

熱門嘅「One Citybus」展覽同期亦有家庭同樂日，更會喺父親節正日（18日）向首200名攜子女入場嘅爸爸大派城巴限量冰巾，保證爸爸們涼在身、甜在心。