南豐紗廠5周年 體驗昔日香港文化

今年12月將踏入5周年嘅南豐紗廠（The Mills），自開幕以來一直通過3大主軸，包括南豐店堂、南豐作坊及CHAT六廠，策劃各式藝文及社區活動，為唔同年齡層帶嚟創新嘅學習體驗。黛安聽聞，為慶祝踏入5周年，紗廠將辦連串精采活動，包括由李錦記全力支持，並與社企上有高堂攜手策劃嘅母親節及父親節親子半日遊，邀請3代同堂一齊遊走南豐紗廠，享受親子時光。

到咗6月，CHAT六廠亦會呈獻以樂壇傳奇潘迪華為主題嘅夏季展覽，透過其照片、服裝、唱片等，回顧潘姐姐嘅輝煌演藝之路。另外，南豐紗廠每年暑假都會舉辦嘅《紗廠童樂節》將配合展覽懷舊主題，以50、60年代流行嘅「茶舞文化」為主軸，再與著名音樂人馮穎琪構思多項互動體驗，畀大家了解昔日嘅香港文化。咁多精采節目，黛安都要留定時間去逛逛先得。