《法言人》中飾演𡃁模CoCo的趙璧渝（Osanna）入行不經不覺10年，她對演戲超級熱誠，曾經投考3次藝員訓練班，不過在TVB一直機會不多、演出不多、戲份不多，淪為「新一代綠葉王」。試過一整年沒有收入，前路茫茫想過輕生。她希望效法盧苑茵、羅蘭等前輩一直演下去。母親和細妹是她追夢的支柱，一直在旁打氣，惟獨家姐的冷漠令她傷心，接受訪問時泣不成聲，「只要家姐...佢有睇我做戲已經足夠...」
同場加映：法言人丨蔣祖曼硬朗外表掩蓋真性情 爭取時間陪仔女：相處似家姐
{{hket:ul-video id="8125"}}{{/hket:ul-video}}
趙璧渝是藝員訓練班出身，很多劇集都有份演出︰例如《老表，你好hea！》、《鬼同你OT》、《純熟意外》、《廉政行動2016》、《降魔的》、《宮心計2深宮計》、《十二傳說》、《金宵大廈》、《殺手》、《星空下的仁醫》、《逆天奇案》、《隱形戰隊》...直至在《法證先鋒IV》（2020年播出）飾演迷幻少女，搏到盡除淨胸圍出位，成為話題，卻是曇花一現，仍然未受器重，才33歲已被視為「新一代綠葉王」。
星途似乎有轉機，《法言人》內有更多戲份，而且還能夠出現於海報上，對她來說是否可喜可賀？
法言人 X 香港愛情故事｜白彪龔慈恩事隔三年再演夫妻 又嗌離婚最後都有圓滿結局【下一頁】
在《法言人》中，趙璧渝飾演一個充滿歷練的女人，失婚後帶著兒子生活。角色年少時是𡃁模出寫過真集，後來被前經理人（翟威廉 飾）威脅勒索而鬧上法庭打官司，她跟主角之一的黃嘉樂有感情戲。趙璧渝自言，角色天性剛強，而且有主見，與其性格差很遠，說︰「我笑點好低，傻大姐性格就乜都冇所謂，好少嬲又唔會有太大反應，講嘢會柔弱啲。導演要我想像好嬲，每日都叫我好嬲，將我能量推高，所以每日開工都要好多力，係一次好好好經驗。」
單親家庭長大的趙璧渝，從小就在母親的保護下，像溫室小花，她稱很易信人，容易受傷，「由細個到初入行，我都覺得身邊所有人都係好，唔覺得會有衰人。同識嘅人，慢慢就當咗係朋友，交心乜都講。入行之後係咁，但點知嗰個朋友將所有嘢公諸於世，甚至加鹽加醋。就算有啲事唔係我做錯，但佢要保護自己，就搵咗我呢個最唔識保護自己嘅人嚟冤枉！我當時覺得好委屈，我又唔識表達自己...」她曾視對方為好姊妹，同時因為此事，自己也築起了圍牆，漸漸疏遠對方，就算現在見到面聊天，已經不可能像以往交心。
黃嘉樂張頴康太太Sweet爆舉牌 「法言人妻團」超強集結撐劇【下一頁】
從小到大，趙璧渝表演慾強，剛畢業時，都做過一些文職工作，亦兼職扮過鬼，在主題樂園鬼屋嚇遊客，這都跟演戲有關。為了入行，她3度投考藝員訓練班，「我入行過程都幾崎嶇，2009年考第一次，取錄咗但屋企人同男朋友都唔支持，想我讀多啲書先。之後一年再考，唔成功，好失望傷心呀！再隔一年，見到再有招募，朋友鼓勵我去參加，我到截止報名最後一日先交表，好彩取錄我...就做到而家嘞！」
10年的星途未有起色，曾經試過有一年完全沒有收入，只收取每個月底薪數千元，根本不足夠生活。她坦言到現時為止，都未能每個月給予家用，甚至要靠家人照顧，「當演員係一份工嘅話，就會話唔值得咁捱，所有嘢唔成正比。而我視佢為夢想，從追夢嘅方向，係值得！食少啲飯都要追夢。我唔會嫌角色奀，希望可以有多啲發揮。有段時間工作停頓咗，我徘徊緊，好唔好轉其他合約形式？例如搵份正職...我點都唔會轉行，想堅持做到好似Madam Lo（盧苑茵）同羅蘭姐咁。有啲人覺得女演員壽命好短，『明星』可能係嘅，做女演員就唔同，可以演人生不同階段，咩年紀都有唔同角色人物。」
趙璧渝續說，有段時間感到迷惘，心情低落得差點有輕生念頭，說到此時感觸落淚，「《法證先鋒IV》之前冇乜起色，有開工嘅，但係角色完全冇對白，喺主角後面行來行去，突然間團火磨滅咗。成個人好唔開心，冇晒目標，暱埋喺房喊。我覺得自己好廢呀，家姐讀書叻，而家做空姐。細妹大學畢業出咗嚟做嘢，反而我呢...好似對屋企冇乜貢獻...我死咗阿媽會傷心，就係嗰刻自救。」家人察覺她有異樣，不斷鼓勵，母親拉著她，一起去街巿買餸，提議她行山做運動。家人買花回家，令屋企朝氣勃蓬。妹妹很體貼，經常陪伴她，明知家姐的經濟狀況，有時出街都會主動支付使費。
面對家人，她感到慚愧，「希望有日有代表作，媽媽會為我感到驕傲。」
令趙璧渝最遺憾的是並未得到家姐的認同，重視親情的她，希望得到更多關心，談起家姐時，泣不成聲，「佢冇開聲反對（以演員為業）...而畀我感覺係，『呢份工作冇乜前途』。好希望得到佢認同呀！我希望喺佢身上睇到多啲鼓勵、愛同支持，好過漠不關心。想家姐認同我做嘅事，睇到我呢10年唔係發明星夢，係好珍惜演戲機會。好簡單...希望佢畀多啲鼓勵，讚我做得幾好...甚至有睇我做戲已經足夠。」
U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】
撰文：王連連
攝影：何家賢
場地提供：Mini hotel Causeway Bay
髮型：Kathy Wong、Eunice Leung@Hair Corner