隱形戰隊｜郭子豪搞喊監製暖男角色入屋 入戲太深鼻水擊中打燈師

《隱形戰隊》昨晚（5日）一集，馬詩婷（林凱恩Iris 飾）最終因為救周大力（郭子豪飾）而慘遭大Dee（古天祥 飾）刺死。

同場加映：中年好聲音｜ 顏志恒浴室歌王走上舞台越戰越勇 望成為兒子好榜樣：夢想無價

{{hket:ul-video id="7928"}}{{/hket:ul-video}}

劇中帶點戀愛腦的大力，之前追求邢風（劉穎鏇飾）時雖略嫌令人煩厭兼嚴重表錯情，但他對邢風的關懷及傻氣大方的性格，已為他贏得不少民心；這次大力愛上馬詩婷，不但盡力令女方覺得幸福，更對對方過去所有包括黑歷史等全盤欣然接受，並竭盡所能予以安慰及支持，確是「暖」到入心。

{{hket:inline-image name="6956.jpg"}}{{/hket:inline-image}}

對此子豪受訪時透露與Iris為了相關場口，由接到分場開始已不斷同導演溝通及研究，更曾Site Visit幫助投入情緒，子豪本人也是做足功課：「我有留意吓身邊朋友，同埋大眾對人生離死別嘅反應，主要透過睇新聞、劇集同電影去攞 Reference。我真係好多謝 Iris，我哋一睇完分場已經係咁傾個角色應該要點做，對緊戲時就已經開始諗行位、停頓位同眼淚位。」

{{hket:inline-image name="56.jpg"}}{{/hket:inline-image}}

之前 Iris受訪時，曾透露在鯉魚門石礦場的拍攝趣事，事緣拍攝當日風勢強勁，子豪拍攝喊戲時涕淚橫飛，對此子豪笑著補充：「有時我喊得太投入會流鼻水，我記得啲風係將我啲鼻水吹到去打燈師度，無論係佢揸住塊發泡膠或佢本人都中咗，我都唔好意思，但佢好專業，一路冇放低塊發泡膠。」

{{hket:inline-image name="65.jpg"}}{{/hket:inline-image}}

談到之後在祖屋的打鬥戲，子豪透露當日甫開工已受傷：「嗰度嘅劇情雖然可能十秒就講完，但嗰日我哋都拍咗成日，至少六、七十個 Shot，頭一、兩個 Shot 我已經整親。主要係有個動作係對方想射我，咁我劈落把槍度再搶咗把槍指向對方，點知把槍一劈落去就爛咗，我就畀入面啲零件𠝹損手，個傷口都有三、四厘米長，止咗好耐血都仲有少少滲血，同監製商量過我都係決定頂硬上，因為仲有成日戲要拍同埋有成班Crew等緊我。」

對於受傷當日最終順利完成拍攝，子豪坦言是成就解鎖：「之後啲場口都有唔少動作戲同感情戲，但我反而覺得自己作為演員，經過嗰日個能力提升咗好多，因為冇諗過自己會咁樣頂得順成日。」子豪續指最開心是搞喊監製文偉鴻（Jazz）：「我好記得我拍喊嗰場戲，我聽到 Jazz都有喊，感動到Jazz我覺得係成就解鎖之一。」

談到暖男角色入屋，子豪再次多謝監製給予機會發揮：「遇到好角色好團隊真係好幸運嘅事，依家出街多咗人叫我周大力，同埋會話：『原來佢真人咁 Cool，我以為佢傻更更嘅添』。」子豪又指演出《隱形》最大突破，是感覺到自己對演戲有了新的體會：「我好似終於感受到進入角色之後去演戲嘅方法，以前會係設計好多嘢再喺現場做番出嚟，變咗件事好用技巧同勞力去堆砌，唔夠人性化。」

隱形戰隊｜林凱恩甩《愛回家》Bonnie形象 演悲劇人物純真到狂野勁突破【下一頁】

撰文 : 娛樂組