人生經歷越多，情感越是豐富。林子善在警匪劇《隱形戰隊》中飾演喬帶囡（女女），在一次追捕行動中，被「隱形任務戰略部隊」同僚槍擊誤傷而需要截肢。該角色醒來，看到自己失去了左腳，崩潰爆喊。現實生活中，林子善已為人夫、人父，同樣都是性情中人。接受《晴報》記者訪問當日，他一字一句細訴入行經過︰有周星馳發掘他拍攝電影《喜劇之王》在前，跟黃子華拍攝劇集《奸人堅》，他教導他怎樣培養情緒喊出來於後。演戲之路，他得到許多前輩、伯樂、拍檔和好友扶持，直到自己結婚有了小朋友，人生完滿。知足常樂的他，真情流露，幾度失聲痛哭。女仔用水造？林子善也一樣。
《隱形戰隊》由陳展鵬、陳山聰、馬國明、唐詩詠、劉佩玥等人主演。林子善扮演的人物女女，由查案時急性子到癱瘓後的種種，喜怒哀樂 ，七情上面，演技被讚，而且不比視帝、視后級演員遜色。他16歲入行做到現在40歲，一直不忘父親教導，林子善︰「成就越高，個頭就要更低，先有機會擁有更高成就！」
隱形戰隊｜林子善唱《愛的呼喚》片段被翻出 劉佩玥讚有驚喜：聽晒成首歌【下一頁】
林子善很年輕便入娛樂圈，在周星馳電影《喜劇之王》飾演小混混洪爺，之後拍了一段時間電影，發展未算順暢，有段時間甚至「冇工開」，經DJ界的朋友介紹下，轉行打碟；當時的環境，打碟師十分受歡迎，搵錢機會大增，他甚至得到很多在東南亞地方表演的機會。直至2005年入TVB拍劇，慢慢建立個人風格。
林子善入行以來遇上不少伯樂，數數手指，他比很多人幸運，有許多貴人扶持，助他成長，「我喺星爺（周星馳）手上出嚟，周生好好人，當我哋係小朋友愛錫，好開心有佢帶我入電影世界。佢教人嘅方式係直接話你知唔掂！到我人越大，諗返轉頭，就知佢每次話我鬧我嘅嘢，都係好有用。以前我成日穿Hip Hop衫，有次佢講『咁好型咩？傻吓先啦』，當時星爺拍緊《少林足球》，我做小混混。後尾我先明白，佢係叫我唔好成日覺得自己有型，要實幹一啲。」
在劇集《My盛Lady》、《奸人堅》跟黃子華合作，他都十分感恩遇上對方，「冇子華神...我就唔會喺TVB拍劇。佢拍戲《一蚊雞保鏢》嗰陣，我哋見過面，之後佢拍《奸人堅》想搵一個人傍喺佢身邊，於是搵咗我...係子華神教我點樣喊。有場戲講我角色金錢豹出獄啦，見到有人接自己喎，感動到喊；我好苦惱，唔知點去演，佢話夾硬谷眼淚就唔係演戲，佢教我點樣投入角色，試吓幻想一啲片段，結果正式拍嗰陣我就喊到飛起！」
隱形戰隊丨林子善角色最搶鏡全靠真感情 監製點名要捧紅：最重要觀眾鍾意【下一頁】
他還有受過田啟文、曾志偉、艾威、王晶等人的幫助，尤其是在經濟困難時，雪中送炭。談到剛過世的余子明和梁舜燕（Lily姐），回憶分別跟他們拍攝劇集《大冬瓜》、《秀才遇上兵》和《同盟》等，甚至忍不住激動流淚，「我哋叫Lily姐做嫲嫲，喺佢哋身上學到乜嘢叫敬業樂業，就算幾辛苦拍到幾夜，都唔好趕住走，咁大年紀仲係好有熱誠；我同子明哥好friend，佢叫我子善哥，成日玩我，我好掛住佢哋，好唔捨得佢哋走。」他沒有去靈堂作最後道別，生怕場景太傷感了。前輩最好的一面，長留心中。
拍《隱形戰隊》時，林子善與劉佩玥（Moon）有很多對手戲，有感情戲，戲外互相鼓勵、有時拍得累了，劉佩玥倚在欄杆休息，他會坐在旁邊默默陪伴。同樣地，女方亦不時鼓勵他，說到這裡又忍不住哭，「爸爸成日教我做人要謙卑啲，可能謙卑過頭變咗自卑！經常覺得自己唔得、唔好，Moon有日捉住我訓話，叫我唔好咁冇自信，『我得嘅』。喂！我同佢無親無故，只係同事咋，佢浪費咗15分鐘同我訓話，叫我加油，好窩心...佢係我好拍檔，暫時咁多合作CP之中，佢係最幫到我嘅幸運星。」
他不忘多謝幕後工作人員的默默努力與付出，自不然談到監製文偉鴻，《My盛Lady》、《城寨英雄》、《超能使者》後，再有《隱形戰隊》，他給予林子善表現實力的機會，「佢嘅劇入面，唔鍾意我做奸，會發掘我另一面畀觀眾睇。《My盛Lady》做老實老公，《城寨英雄》就義氣人物。我而家好容易喊，《隱形戰隊》寫我感情豐富，囡囡個角色就係咁感性，對朋友有義氣。」在演技不斷提升的同時，他表示還有很多弱點，背對白是最弱一項，將勤補拙。
成績越來越好，但林子善沒有刻意跟TVB簽約成為「親生仔」，沒有考慮換取獎項增值身價，「我都恨攞獎，民選先係最重要，大哥（鄭嘉穎）話第一次拎視帝都唔係個個認同，佢話唔緊要，做到有一日全部人認同。二哥（馬國明）都係民選出嚟。我要搵錢就唔會喺TVB，我心態係當返學校學演戲。」
林子善在TVB賺到的是一班「稱兄道弟」的朋友，跟鄭嘉穎、馬國明、黃嘉樂、唐詩詠拍攝《鐵馬尋橋》後，關係密切得以阿哥阿妹相稱，林子善笑說︰「我哋《鐵馬》家族就好似獅子食象，象食老虎，大笨象驚老鼠。我哋之間邊個有事，其他人就一呼百應，乜都幫手！拍《怒火街頭》大哥特登早啲返廠睇我做戲，見到有乜唔好就教我點做。拍《隱形戰隊》時二哥知我壓力爆煲，日日都好多場喊戲，佢知我大壓力，捉咗我去食飯，安撫我，叫我放鬆啲，馬明係好sweet嘅！喺我最唔開心時衝出嚟陪我。阿妹（唐詩詠）就好窩心，撮合我呢段婚姻，又照顧我生活大大小小。三哥（黃嘉樂）最近有新發展，大家都想幫佢，佢好有自己想法，但有時諗埋一邊，好似我咁！佢想結咗婚之後唔使太太做嘢，自己一個養家...喂！三嫂（Samantha）係知名攝影師，佢負擔得到，使乜你養？你搞掂自己先啦！」
在餐廳做訪問期間的各種話題，都能觸及林子善的神經，敏感度超級高，提到傷心事，坦率地哭出來，沒有理會身邊還有其他顧客，個性就是如此實實在在，「做咗爸爸之後，眼界爆開！每個人都有父母，如果我對對方唔好，佢哋父母都會唔開心！所以我唔想傷害任何人，與人為善。我教阿女（3歲的林以晴）要善良，如果佢扯姐姐（外籍傭人）頭髮，我會輕輕力扯番佢；佢篤姐姐眼？我又輕力篤佢，要佢知道嗰種感覺，知道咁係會痛，我話畀阿女知，人哋感受到嘅都係一樣，之後佢先唔敢做。」教育一代，就像他的名字一樣︰要善良，不要傷害人。
林子善在求學階遇上好老師，叮囑他做一個好人，領悟到教育是很重要，「所以阿女將來要對社會有貢獻...首先佢要學識金鐘罩，保護自己，亦都要學七傷拳，知道傷害性有幾大，就唔會去傷害人。做人做事呢，唔好怕蝕底，你有能力先會蝕底，同埋幫人唔好望回報。為人父母，盡能力教啦，如果都係學壞，佢要自己負責任。希望我個女...就算冇宏大志願，都要做好本份，有大愛有能力就去幫助別人。搵唔到錢？唔緊要啦，記得要幫人。搵唔搵到錢冇所謂，人生閱歷係無價。」
他談到家庭，說到太太與囡囡令自己人生完滿時，喊得更犀利，最後向女兒承諾︰「將來有任何人傷害你，有乜事記得話畀『爸Boo』聽，我有生之年都會保護你、支持你。我都經歷過反叛期，覺得做乜嘢都冇人明白自己，我明白嗰種孤獨與難受...到時真係有咁嘅情況，阿女，你記得話我知，我一定會用心聆聽。」
U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】
撰文：王連連
攝影：陳健珊、何家賢
服裝︰Needless
場地︰Urban Coffee Roaster