兔子「肉包」登陸星街小區 迎復活節推廣環保

唔經唔覺，好快又到復活節，黛安聽聞，星街小區會趁復活節，再次邀請台灣插畫品牌emmaAparty筆下嘅人氣兔子「肉包」，換上由可持續時裝設計團體Fashion Clinic設計嘅春日「升級」新裝重遊舊地，為小區帶來節日氣氛。「肉包」嘅盞鬼表情及幽默感教人會心微笑，粉絲記得去打卡留念呀。

即日起至4月16日期間，「肉包」就會喺星街小區與大家共度復活節。佢仲為今次「旅程」特別着上春日新裝，呢套新裝原來係由升級回收材料製成，仲用上俏皮可愛設計，搭配色彩繽紛主色調，洋溢活力嘅春日氣息，與象徵活力、生命力及重生嘅復活節不謀而合。今次「升級再造」復活節「肉包」裝置，更印證咗星街小區通過回收材料和推廣環保品牌，與實踐對可持續發展嘅承諾。