中電落馬洲河套區變電站 憑創新環保設計奪「亞洲電力行業獎」

近年中華電力致力喺發電過程及業務營運中減碳，除咗應用創新科技、推動業務數碼化外，亦透過為發電及供電網絡基建減碳。公關姊妹噚日就傳嚟好消息，原來中電興建中嘅落馬洲河套西132千伏變電站，憑卓越嘅環保建築規劃及設計，最近喺被譽為電力業界奧斯卡嘅「亞洲電力行業獎」（Asian Power Awards）中，奪得2022年度「亞洲最佳輸配電項目金獎」。

呢個變電站位於落馬洲河套區內，預計2026年第一季投入運作。黛安聽聞，呢個項目將支持港深創新及科技園發展，可為區內未來嘅科研、教育和文化創意中心、住所及配套設施等，提供穩定可靠嘅電力供應，支援港深兩地創科合作及發展。中華電力輸電及供電業務部高級總監張寶中對今次獲獎深感鼓舞，仲話好高興工程團隊嘅電能專業及表現得到亞太區業內人士嘅認同。