麥當勞一連3日亞博辦年度晚宴 逾8000員工歡聚一堂

一向重視員工嘅麥當勞，剛剛喺今個星期二至四（7至9日），舉行因疫情而闊別3年嘅員工年度晚宴，一連3日喺亞洲國際博覽館筵開逾600席，與逾8,000名員工、合作夥伴和嘉賓歡聚。香港麥當勞行政總裁黎韋詩喺晚宴上分享，好開心再與McFamily聚首一堂，雖然疫情下面對唔同挑戰和難關，但麥當勞仍上下一心為顧客帶嚟優質貼心嘅用餐體驗，亦感謝所有同事緊守崗位。

黛安知道，麥當勞仲請嚟有份參與「去麥記lor？」品牌活動嘅人氣歌手Dear Jane，同埋曾為麥當勞唱早餐歌嘅張蔓莎（Sabrina）表演熱播金曲，員工嘅反應好熱烈呀。當晚管理層亦頒發多個獎項，包括20年、25年、30年及35年長期服務獎及年度傑出員工大獎，嘉許唔同員工嘅出眾表現。此外，晚宴上抽獎環節送出咗多份名貴禮物及現金獎，令員工都好開心。展望未來，佢哋話會繼續攜手與每位McFamily成員，麥麥進步，再創高峰。