YOHO MALL「新春金運遊樂園」 ONE PIECE中式造型亮相+年貨及文青市集

每年農曆新年，各大商場都會籌備主題活動，黛安知道，今年YOHO MALL準備請大家同ONE PIECE草帽小子一伙踏上尋寶冒險之旅，一齊暢遊多個主題打卡裝置、新春年貨及文青市集。今次一眾人氣角色仲獲得日本官方授權，首度以兔年中式造型同大家團拜。

另外，即日起至本月31日，YOHO MALL更特別打造「新春金運遊樂園」活動，路飛、索柏、奈美、魯賓及烏索普等，都會着住中式新春造型穿梭場內多個開運打卡裝置，陪大家尋金探險。

黛安都約咗姊妹去YOHO MALL I行新春美食賀年市集辦年貨，聽聞場內雲集逾20個攤位售賣各款賀年食品、禮盒及美酒，仲有港澳台等地嘅美食，例如手工蛋糕、糯米糍、台灣老天祿鴨舌等，更有賀年蘭花展進駐，一次過就可以辦齊年貨，好方便啊。另外，YOHO MALL今年都設計咗一套「魚躍花見」利市封，會員只需要喺場內以電子貨幣消費滿指定金額，或以指定會員積分即可換領。