港鐵LOUDER由年輕團隊主理 逾百本地品牌進駐

聖誕節大家揀好禮物未？黛安聽聞，港鐵公司今年為顧客帶來全新O2O（Online-to-Offline）零售品牌「LOUDER」，由公司年輕團隊自發創立及主理，為充滿熱誠嘅出色本地年輕創業家，提供全方位零售平台，推廣本地創意產業發展。

LOUDER至今已有過百個品牌進駐，有近5,000款、11個種類嘅產品，包括香薰、文具、時裝等，大部分為本地設計或製作。更推出獨家「支持本地設計師」徽章，畀顧客輕易識別香港設計師嘅作品。公關姊妹仲話，LOUDER首家實體店已於8月喺將軍澳康城開業，上月登陸九龍灣德福廣場，並會陸續進駐各區港鐵商場，包括計劃明年開業嘅大圍站「The Wai圍方」及黃竹坑站「THE SOUTHSIDE」；網店亦已投入服務，積極推動結合綫上綫下購物一體化，接觸更多目標顧客群。