滙豐贊助探「塑」潔淨水域計劃 太陽能船回收塑膠垃圾

滙豐集團前年11月起與本港非牟利組織「潔淨水域行動」合作，贊助推行「探『塑』潔淨水域計劃」，透過4隻零碳排放太陽能船喺香港水域收集塑膠垃圾，至今已收集逾14萬個膠樽、6.4萬個鋁罐及81噸漂浮垃圾。黛安知道，即日至本月30日滙豐會喺總行大廈大堂舉行公眾攝影展，慶祝計劃2周年。

公關姊妹話，4隻小型太陽能船，過去21個月出動超過1.6萬小時，每日沿維多利亞港同香港仔海傍航行，收集到嘅膠樽同鋁罐都會送去循環再造。今次攝影展將會展示多名攝影師與參加者影低嘅相，畀大家了解計劃內容之餘，仲可欣賞船隊嘅英姿，了解每日嘅航行歷程。

另外，計劃又會為學校提供課程教材，同埋舉辦教學工作坊，例如今年7至10月就有過千市民參與荃灣Fabrica X零售體驗店嘅回收工作坊，將塑膠垃圾轉化為日常家居用品，活動真係好有意義。