上水廣場「甜粉聖誕派對」 Sonny Angel6大節日造型登場

最近唔少商場都落足心機打造聖誕裝置，希望大眾可以歡度佳節。公關姊妹同黛安講，上水廣場喺本月27日至明年1月2日舉行盛大「Sonny Angel甜粉聖誕派對」，邀請各位粉絲親臨商場，與6個以全新節日造型登場嘅Sonny Angel巨型主題裝置近距離接觸，大玩互動遊戲及打卡，包括設於2樓中庭、3.5米高嘅「情迷白日夢水晶球」；而鍾意影相嘅朋友就唔好錯過「粉炫幻影趣拍區」，聖誕老人Sonny Angel會喺9米閃爍粉紅聖誕樹下，為大家施展魔法，等你可以影輯靚相；場內更有販售機出售4大系列迷你公仔，保證大家樂而忘返。

另外，顧客喺場內即日消費滿指定金額，更可換領限量心甜禮物，包括Sonny Angel暖笠笠咕𠱸及多用途旅行收納包，或喺場內參加工作坊親手繪製獨一無二嘅Sonny Angel及貼上小裝飾打造閃亮派對服飾，一齊共度暖笠笠嘅粉紅聖誕。