YOHO MALL「雪影極幻森林」 雪國小鎮6大美景任打卡

距離聖誕節仲有個零月咋，黛安收到風，今個月19日至明年1月2日，YOHO MALL將打造大型聖誕主題裝置「雪影極幻森林」，為大家製造難忘嘅北歐雪國奇幻回憶，到時將有多隻雪白麋鹿化身為嚮導，帶大家穿梭於場內嘅雪國小鎮6大美景，首先以「閃炫玻璃屋」為起點，途經以近2萬顆小燈泡打造嘅「雙色夢之森」，再探訪「雪人觀星席」及「炫白情人樹」等。

此外，場內更設有6米高嘅巨型「聖誕星光塔」，夢幻樹屋由精緻嘅節日裝飾與北歐風嘅飾物結合而成，必定成為文青嘅打卡熱點。大家沿住歐式街燈行，就可以搵到歐陸雪山小屋「極光體驗館」，見到圓拱頂歐陸雪山木屋時，記得喺門廊前影返輯靚相呀！踏進木屋，就會見到幻影般極光環繞穿梭，保證令你眼前一亮。睇見垂吊彩帶裝置配合光影折射特效塑造嘅幻彩光芒，細細擺動嘅極光恍如流星般劃破冰川極地，真係絕美風景。