現年51歲的江美儀在台慶劇《下流上車族》內，同林敏驄飾演兩公婆，女方竟有騷身材的場面，在鏡頭前穿泳衣及性感內衣。幸好美儀平時有行山做運動習慣，圈中跑友包括發哥周潤發、鮑姐鮑起靜、唐詩詠、黃翠如及伍富橋等，加上良好飲食習慣，身形保持得相當之窈窕。她笑言：「老實講呢幾年唔係有做運動，叫我着件黑絲都未必敢，自己照鏡都啃自己唔落，好似驄哥話齋『唔好影響市容』。」
同場加映：下流上車族｜鮑起靜樂做銀髮族跟發哥學慢跑 拒跟女兒移民英國與老伴留港度餘生
{{hket:ul-video id="6929"}}{{/hket:ul-video}}
美儀認為，做運動是百利而無一害。她略嫌現時身形偏瘦，希望體重增加少許，而運動量維持每個星期日去行山，若有時間會找一日跑步，「會盡量選路程短兼慢跑，以前要長又要快，體力消耗得太勁，一時間好難補充，始終體能唔同後生仔。食兩個麵包又會肥番，要明白每個人喺每個階段做唔同嘢。」
至於個人飲食方面的調整？她說：「而家食全素，仲會日日喺屋企拉筋，唔拉會周身唔舒服咁。食素可能令人蛋白質爭少少，會食番多啲。其實我食咗素一年，都係時候去驗身，睇吓身體情況係點。現時為止覺得OK，之前食半素都有4、5年，效果唔錯，血壓仲靚過之前食肉。」美容自然不可少，她說：「都有嘅，重點都係做運動之後，整個人精神啲，從頭髮、指甲生長就知道，當你出一身汗排走毒素後，自然臉色都會靚啲。（平日有煙酒習慣？）冇食好耐，開心酒就久唔久飲少少，又唔會飲到好醉嗰種，開心飲1、2杯。」
下流上車族︳江美儀獲拍檔林敏驄封「助攻王」 放棄唔撈想法：仲有咩識做？【下一頁】
提到《下流上車族》內講老公林敏驄「落錯車」賣樓，現實生活是否有發生？美儀話：「冇！係阿媽投資有眼光，而家層樓仲供緊，供好少但就升值好多，我哋係十幾年前買，當年300幾萬，而家已經唔止呢個價。（投資心得？）而家好難講，香港啲樓太貴，買磚頭都唔係咁容易，而家美國加息我哋又加息，要畀多幾錢去買樓、供樓？其實有個壓力喺度，趨勢...係咪租住樓住先？（有投資股票市場？）嘩！呢輪跌到呢…我真係『吓』咗出嚟，跌到一半都冇，經紀日日短訊畀我，冇眼睇。我都係諗住當儲錢，起碼叫做有息收…」
對於買「磚頭」或股票的投資，她認為不要侷限一樣，要找適合自己的投資方法，「好似有啲人去買古董，亦有啲人會買基金債券，又唔一定要買樓。儲磚頭呢樣嘢喺我哋細個時仲得，而家真係有啲難度，千幾、二千萬嘅樓邊有咁容易儲到首期？我只係一個藝術家，對呢啲嘢其實好白痴，都係靠阿媽幫我去買賣，講真又唔係好多錢，由得佢幫我搞。」
下流上車族丨林敏驄自責累老婆捱苦激動落淚 喊戲一Take過 江美儀：性情中人【下一頁】
投資方面有媽媽代勞，感情就要靠自己取爭，美儀於2018年與老公吳君祥（吳君如胞弟）分開，去年主持節目《Mean Talk》，老友單立文重提此事，她突然在鏡頭前爆喊。美儀透露現時感情生活一片空白，出街食飯同玩的朋友有很多，能夠發展的就未有，「我信李居明師傅說話，出年我啲嘢就會嚟，先靜待佳音。（希望真命天子快啲出現？）當然…有時返屋企一個人食飯對住電視機，如果有個人傾吓偈幾好，但係呢啲嘢有正有負，多個人又會有啲嘢顧慮，例如食飯要諗去邊度食。而家我好自由，唔需要向任何人交代，就算第時識到另一半，唔會話要一齊住或者結婚，最好各自各生活啦，可以約出嚟見面或去旅行。（冇畀上一段婚姻困擾？）冇，都決定得離婚又過咗咁耐，已經放開咗嘞，我哋仲係朋友，耐唔耐有傾偈，又唔係仇人！（見你上次講到喊）因為一直冇講呢件事，係完全冇講過，揭發咗出嚟先講。自己性格從來報喜不報憂，分開咗有咩好講？始終唔係兩個人嘅事，係關乎兩個家庭嘅事，我講咩都對大家唔公平，點解仲要講呢？不如唔好講出嚟。」
（↓點擊放大睇圖片↓）
- {{hket:inline-image name="Image08.jpeg"}}{{/hket:inline-image}}
最後問到她，《下流上車族》是否令她成為視后的機會大增？美儀表示：「而家講早咗少少，仲有兩套台慶劇喺後面，可能仲好睇呢！我哋只不過好彩開頭有咁好收視，亦希望之後更加好。問我梗係最想攞『最佳劇集』，因為呢種團隊精神我係好耐好耐未遇過。又或者同驄哥攞『最合拍熒幕情侶』獎，咁麻煩嘅人都搞得掂，我覺得自己好叻，哈哈！仲要出到嚟觀眾咁受落，呢件事個幾值得回味，幾年後都會講番呢件事，驄哥我都搞得掂！」
撰文：梁榮達
攝影：黃敬博
服裝：MARELLA
髮型：Ivan Lee @ Headquarters
U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】