港鐵再推「一 Click 即搶」 送4萬張電子優惠券

唔知大家用完10月派發嘅消費券未，黛安收到風，港鐵將透過MTR Mobile再次推出「一Click即搶」活動，即搶優惠係全新登場嘅「車站商店電子優惠券」，活動會喺本周四（27日）下午2點開始，送出總值達$1,000,000、共40,000張車站商店電子優惠券，適用於港鐵站多間指定商戶，包括美心西餅、東海堂、奇華餅家、爭鮮外帶壽司、鴻福堂、萬寧、屈臣氏、Giordano等，參與商戶逾60個品牌、合共逾400家店舖㗎。

參加方法好簡單，首先登記成為MTR Mobile登記用戶，喺上述時間登入MTR Mobile點選「我的獎賞」，再喺「禮遇」頁面點選相關推廣優惠，揀定優惠後即點選「立即領取」，成功領取後，畫面就會顯示確認記錄，電子優惠券就會喺24小時內加到「我的獎賞」欄。優惠券先到先得，送完即止。