信和商場夥拍Now TV 64場世界盃免費足本播

4年一度國際足球盛事世界盃，下月20日將喺卡塔爾開波喇！黛安收到風，信和集團將斥資$880萬喺旗下商場增設多個大電視，以及打造連串精采活動，其中3大商場，包括奧海城、屯門市廣場及荃新天地會同NOW TV合作，全程免費直播64場精采賽事，陪大家見證每一個入球時刻。11月至12月期間，更會推出多項購物獎賞，大家到時記得去掃貨呀。

公關姊妹話，奧海城將同以往歷屆一樣，與大眾「全城開波」，喺地下中庭位置鋪設逾3,000尺人造草氈，並特設座地430吋大電視全程免費直播賽事，令觀眾好似置身現場草地睇球賽；場內另一邊活動大堂，亦會增添430吋大電視播放英語旁述，方便唔同語言嘅球迷觀賽。屯門市廣場則擁有全港商場最大嘅540吋4K大電視，以超高清畫質足本播放球賽；喺指定場次仲特設「Beauty Me」專區，提供球隊應援美甲、彩繪、按摩服務㖭。至於荃新天地除直播球賽，仲會喺指定周末安排西甲足球學校教練到場教授足球技巧，S+REWARDS會員可憑點數免費報名參加㗎。