荃新天地化身冰川世界 冰川滑梯+環保聖誕樹＋工作坊

全球暖化令冰川持續融化，黛安聽聞，荃新天地由11月25日至明年1月2日，將舉辦「Merry Christmas！Goodbye Plastic！」主題活動，打造多個體驗區及打卡位，例如場內中庭將化身冰川世界，小朋友可以穿上企鵝裝，化身肥嘟嘟小企鵝，喺8米長嘅「小企鵝大逃脫」冰川滑梯主題區，避過由膠樽砌成嘅海浪天幕，逃離海洋塑膠廢物威脅；即場捐$20畀香港海洋公園保育基金或S+REWARDS會員憑3點數，即可參與乙次。

成功逃脫嘅小企鵝可以去挑戰「小企鵝魚樂無窮」，感受喺冰川釣魚嘅樂趣，當中嘅魚池同魚係由廢膠塑料等再生廢料組成，玩樂之餘極具環保教育意義。

另外，商場仲特別用咗逾千個回收膠樽升級再造成5米高嘅聖誕樹，陪大家度過浪漫環保聖誕；仲有排排企嘅小企鵝等住同大家打卡影相。場內亦設有企鵝生態主題展覽及回收資源教育中心，S+REWARDS會員喺指定日期仲可憑點數，參加由專業導師教授嘅「小企鵝擺設工作站」同「小企鵝座枱燈飾工作坊」㖭。