中電愛跳舞決賽 8隊高手比拼宣揚節能

推廣環保都要講創意，中電就透過舉辦跳舞比賽宣傳環保，仲吸引近50隊熱愛跳舞嘅朋友報名，參加者用唔同舞種，如街舞、K-pop、爵士舞等，加入創意跳出愛心、傳電、環保節能等信息。黛安知道，其中8隊舞林高手噚日舉行決賽，每隊都施展渾身解數，炒熱現場氣氛。

中電企業發展總裁莊偉茵（Quince）同兩位本地排舞師黃祖耀及狂舞派女演員劉敬雯擔任評判，Quince話參賽者創意無限，愈睇愈心曠神怡。另外兩位評判就話參賽者好專業，感染力同勁力十足。

公關姊妹話，今次比賽係中電愛跳舞活動其中一項社區活動，希望喺疫情下鼓勵大家做運動。中電愛跳舞活動早前亦辦過唔同活動，如社區跳舞班、親子網上跳舞比賽等，推廣跳舞慳電。中電仲會按活動期間參與人士嘅跳舞次數，透過中電全心傳電計劃為有需要人士提供電費資助，總額高達200萬港元㗎。